KER PA LUBANGA Gin Mumiyo Pire Tek Bot Yecu

Kit ma waneno kwede i pwony mukato-ni, Yecu odyero kwone kun “tito dok nyuto lok me kwena maber i kom ker pa Lubanga.” (Luka 8:1) En otute ki kerone ducu kun woto pi mairo mapol i lobo Icrael wek epwony dano lok i kom Ker pa Lubanga. Kicoyo lok madok i kom tic me pwony pa Yecu i Jiri angwen, dok jiri magi giloko i kom Ker-ri tyen makato 100 kulu. I jiri magi, Yecu tutwalle aye oloko i kom Ker pa Lubanga, ento lokke nen calo obedo bute matidi ka kiporo ki lok ducu ma en otito i kom Ker-ri.—Jon 21:25.

Pingo Ker-ri onongo pire tek tutwal bot Yecu i kare ma en tye i lobo? Pien Yecu onongo ngeyo ni Lubanga oyere me bedo Lalocce. (Icaya 9:6; Luka 22:28-30) Ento Yecu pe oketo tamme me nongo twero nyo deyo. (Matayo 11:29; Marako 10:17, 18) En pe otito pi Ker-ri wek enong adwogi maber pire kene. Ma ka meno, Yecu tye ki miti madit i kom Ker pa Lubangaa pien bikelo adwogi maber bot Wonne me polo ki bene lulub kore ma lugen.

GIN MA KER-RI BITIMONE PI WON YECU

Yecu tye ki mar matut pi Wonne me polo. (Carolok 8:30; Jon 14:31) En tye ki pwoc pi kit mabeco pa Wonne calo Mar, Kica, ki dong Ngolo kop atir. (Nwoyo Cik 32:4; Icaya 49:15; 1 Jon 4:8) Pi meno, watye ki gen ni Yecu dag winyo lok goba ma kitito i kom Wonne—lok goba calo ni Lubanga pe paro pi can ma dano gitye ka denone-ni ki dok ni Lubanga mito ni waden can. Man tyen lok acel mumiyo Yecu otito “kwena maber me Ker pa Lubanga” ki mit kom—en onongo ngeyo ni i kare me anyim Ker-ri bilonyo nying Wonne bedo maleng. (Matayo 4:23; 6:9, 10) Man bitimme nining?

Jehovah bitic ki Ker-ri me kelo alokaloka madongo wek dano gunong adwogi maber. ‘En bijwayo pig wang ducu’ ki i wang dano ma lugen. Jehovah bijwayo gin ma kelo pig wang, dok en binenone ni ‘to bene dong pe, kadi kumo nyo koko, nyo arem.’ (Niyabo 21:3, 4) Lubanga bitic ki Ker-ri me jwayo can ducu ma dano gitye ka denone.b

Pe tye me ur ni Yecu otito ki mit kom lok madok i kom Ker pa Lubanga! En onongo ngeyo ni Ker-ri binyuto ka maleng ni Wonne tek dok lakica adada. (Yakobo 5:11) Yecu onongo bene ngeyo ni Ker-ri bikelo adwogi maber bot jo ma kitgi atir.

GIN MA KER-RI BITIMONE PI JO MA LUGEN

Con ma peya Yecu obino i lobo, en okwo kacel gin ki Wonne i polo. Jehovah otiyo kwede me cweyo jami ducu—en ocweyo polo ki lakalatwe ma iye ki dong lobo kacel ki jami makwo mapat pat ma tye iye. (Jo Kolocai 1:15, 16) Ma dong pire tek loyo aye ni Yecu onyuto ‘mar’ pi dano—Carolok 8:31.

Yecu onongo maro dano i kare ma tye ka tiyo ticce me pwony. Nicakke i acakkine, en owaco atir ni ebino ka ‘tito lok me kwena maber-ri’ bot lupeko. (Luka 4:18) Ento, Yecu pe oloko aloka keken ni emito konyo dano. Tyen mapol, en otimo jami mapol ma nyuto ni emaro dano. Me lapore, i kare ma dano gugure ka winyo lokke, “kica omake i komgi, ci ocango lutwo ma gukelo bote.” (Matayo 14:14) Ki bene, kica omako Yecu i kare ma laco mo ma tye ki two malit adada obedo ki niye ni en twero cango twone ka ce ada mito. Yecu ocango laco-ni kun loko ki cwiny me kica ni: “Amito; komi olony.” (Luka 5:12, 13) I kare ma Yecu oneno Maliam tye ka koko ominne Lajaro, Yecu “iye owang matek” ‘ocur ki i cwinye,’ ki dok bene “okok ki pig wange.” (Jon 11:32-36) Lacen en otimo gin mo ma ocungo wi dano—Yecu ocero Lajaro kadi bed ni onongo dong oto pi nino angwen kulu!—Jon 11:38-44.

Ki lok ada, Yecu onongo ngeyo ni jami ducu ma etimogi-ni gitye pi tutunu. En onongo ngeyo ni jo ma ecango twogi-ni gubitwo doki ki jo ma ecerogi-ni gubito dok aye. Ento, Yecu onongo bene tye ki ngec ni Ker pa Lubanga keken aye bicobo pekki ma kit magi. Meno aye gin mumiyo Yecu pe obedo ka timo tango keken; en bene obedo ka tito “lok me kwena maber me ker pa Lubanga” ki arima madit. (Matayo 9:35) Tango ma en otimogi-ni onongo ginyuto jami mapol ma Ker pa Lubanga bitimone cokcok-ki i wi lobo lung. Nen kong gin ma Baibul waco ni bitimme i kare meno.

• 

  Kom dano bibedo yot.

  “I kare meno lutowang wanggi biyabbe, jo ma itgi oding bene itgi biyabbe. I kare meno lungolo bipye malo calo til, ki jo ma te lebgi oto gibicako wero wer ki yomcwiny.” Medo i kom meno, “pe tye dano mo ma bedo i lobowa ma biwaco ni, ‘An koma lit.’”—Icaya 33:24; 35:5, 6.

• 

  To bibedo pe.

  ‘Jo ma kitgi atir gibicamo lobo, dok gibibedo iye matwal.’—Jaubli 37:29.

  “Rwot Lubanga dong bimwonyo to woko matwal, dok en bidunyo pig wang dano woko ducu.”—Icaya 25:8.

• Jo muto kibicerogi.

  “Jo ducu ma tye i lyel biwinyo iye dwane, ci gibikatti woko.”—Jon 5:28, 29.

  “Dano gibicer woko.”—Tic pa Lukwena 24:15.

• 

  Dano bibedo ki pacogi kacel ki tic.

  “Dano gibigero odi ci gibedo i igi, gibipuro poto olokgi, ci gibicamo nyige bene. Pe gibigero odigi ci giweko ngat mukene aye bedo iye, pe gibipuro poto olokgi ci giweko ngat mukene aye ma camo nyige. . . . Jona ma an aye ayerogi gibibilo tic me cinggi pi kare malac.”—Icaya 65:21, 22.

• 

  Lweny bibedo pe.

  “En juko lweny woko i wi lobo ducu.”—Jabuli 46:9.

  “Rok mo pe bitingo pala lucwan i kom rok wadigi, pe dong gibimedde ki pwonyo lweny.”—Icaya 2:4.

• 

  Cam bibedo mapol.

  ‘Lobo biceko cam mabup; Lubanga ma Lubangawa bimiyowa gum.’—Jabuli 67:6.

  ‘Cam bene myero ocek mabup i lobo, opong wa wi godi-gu woko ducu.’—Jabuli 72:16.

• Can bibedo pe matwal.

  “Jo ma piny obwoyogi pe gibiwekogi ata kare ducu.”—Jabuli 9:18.

  “En laro dano ma piny obwoyo ka okok bote, konyo lucan ki jo ma pe gitye ki ngat ma konyogi. Kica make i kom jo magoro ki ma piny obwoyogi, ci laro kwo pa jo ma piny oloyo.”—Jabuli 72:12, 13.

Tika iromo niang gin mumiyo Ker pa Lubanga pire tek bot Yecu ka itamo i kom jami magi ma Ker-ri bitimogi-ni? I kare ma Yecu tye i lobo, en otito pi Ker pa Lubanga ki mit kom bot ngat mo keken ma mito winyo lokke pien onongo ngeyo ni Ker-ri keken aye bijwayo can ducu ma watye ka denone i kareni.

Tika cikke ma kicoyo pire i Baibul madok i kom Ker-ri gudo cwinyi? Ka tye kumeno, ci in iromo pwony lok mapol i kom Ker-ri nining? Ngo ma myero itim wek inong adwogi maber ki i jami ma Ker-ri bitimone? Pwony me agikki bigamo lapeny magi.