Ka Ngat ma Inyomme Kwede Oturo Gennene

Maria, ma a ki i lobo Spain owaco ni: “I kare ma cwara owacca ni ebiweka pien enongo dako ma pud tidi, awinyo calo omyero ato woko. Awinyo calo en otera marac adada, tutwalle ma wiya obedo ka po i kom jami ma ajalo pire.”

Bill, ma a ki i lobo Spain owaco ni: “I kare ma dakona oweka atura, awinyo calo gin mo oto woko i iya. Anyimwa, genwa, ki yubwa ducu oballe woko. I nino mogo onongo awinyo calo dong atye maber ber, ento ma pe orii nongo dok atye ki arem malit adada i cwinya.”

TIM me abor kelo tur cwiny marac adada. Tye ada gire ni jo mukene ginongo ni gitwero timo kica ci giyelle me dongo wat i kingi odoco.a Ento, kadi bed nyomgi oket nyo pe, jo ma giniang ni luotgi otimo abor giwinyo arem cwiny malit adada. Jo ma kit magi gitwero lweny ki arem man nining?

TYENG MOGO ME BAIBUL MA TWERO KONYI

Kadi bed ni cwinygi otur, jo mapol ma pe gubalo ginongo kwe cwiny i Ginacoya. Gupwonyo ni Lubanga neno pig wanggi dok winyo aremgi.—Malaki 2:13-16.

“Ka atamo pi jami mapol, in ikweyo cwinya ki kicani.”—Jabuli 94:19.

Bill, ma kiloko i kome malo-ni, wiye po ni: “Ma abedo ka kwano tyeng meno, agoyo i wiya ni Jehovah tye ka kweyo arem ma i cwinya kit macalo wego ma lakica timo kwede.”

“Rwot [Jehovah], in lagen bot jo ma lugen.”—Jabuli 18:25.

Dako mo ma nyinge Carmen, ma cware obedo ka timo abor pi dwe mapol owaco ni: “Cwara pe obedo lagen. Ento onongo atwero geno ni Jehovah bibedo lagen bota. En pe biweka ata.”

“Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu. . Man bimiyo kuc pa Lubanga ma kato ngec pa jo ducu gwoko cwinywu.”—Jo Pilipi 4:6, 7.

Lamego mo ma nyinge Sasha owaco ni: “Akwano tyeng man tyen mapol adada. Ma amedde ki lega matek Lubanga omina kuc i kwona.”

Jo ducu ma kiloko i komgi malo kany-nyi i kare mogo onongo giwinyo calo tyen lok me kwo dong pe. Ento guketo gengi i kom Lubanga Jehovah dok gunongo kero ki i kwano Lokke. Bill oloko kit man ni: “Niyena oweko kwona obedo ki tyen lok i kare ma jami mukene-ni oballe woko. Kadi bed awoto i ‘nota macol licuc’ Lubanga obedo kweda.”—Jabuli 23:4.

a Pi ngec mukene ma twero konyi me moko ka omyero itim kica nyo pe, nen pwony ma okatti i Awake! me April 22, 1999, ma wiye tye ni “When a Mate Is Unfaithful.”

Jami ma Okonyo Jo Mukene me Kanyo

Lwod lok me cuko cwiny ma nonge i ginacoya.

Bill otito ni, “Akwano buk pa Yubu kacel ki Jabuli kun angolo te lok mo keken ma aneno ni rwatte ki kwona. Aniang ni jo ma kiloko i komgi i bukke magi guwinyo arem ki par calo an.”

Nong kwe cwiny ki i wer.

Carmen wiye po ni, “Ka onongo pe atwero nino i dyewor, onongo awinyo wer. Man okweyo cwinya matek.” Daniel owaco ni, “Apwonyo kit me goyo guitar dok anongo ni keto cwinya i tuko wer okonya me bedo ma wiya ki cwinya opye mot.”

Nywak kit ma iwinyo kwede.

Daniel owaco ni, “Onongo pe amaro lok i kom kit ma awinyo kwede. Ento onongo atye ki lurem mogo mabeco, dok abedo ka lok kwedgi nino ducu. Aweko gungeyo kit ma awinyo kwede i waraga ma acoyo botgi ki dok i lokka. Meno okonya mada.” Sasha owaco ni: “Kony ma anongo ki bot jo gangwa pire obedo tek ma pe wacce. Mamana obedo tye me konya kare ducu. Ka onongo amito lok, en kwanyo kare me winyo lokka. Babana bene oweko awinyo ni gimara, dok okonya me cang motmot.”

Medde ki lega.

Carmen owaco ni, “Onongo alego kare ducu labongo keng. Awinyo calo Lubanga tye cok kweda, kun winyo legana dok konya. I kare me peko man, adongo wat macok adada ki Lubanga.”