Ka Itye ka Lweny ki Two Malit

Linda, ma tye ki mwaka 71 owaco ni: “I kare ma aniang ni atye ki two kanca i cin iya madongo ki i obo-na, awinyo calo dong kingolo kop me to i wiya. Ento i kare ma ao gang i nge neno daktar, acako tamo ni, ‘Pekone otura atura, ento omyero anong yo me lweny kwede.’”

Elise, ma tye ki mwaka 49 owaco ni: “Atye ki two malit adada ma oneko ler ma i but wiya tung acam woko. I kare mogo, arem ma awinyo weko cwinya tur marac. Tyen mapol, awinyo calo atye kena dok abedo ka tamo me kwanyo kwona woko.”

Laco ma kome lit ma obedo i lela pa lungolo kun jo ma marre gurume dyere

KA KINONGO ni in nyo dano mo ma imaro tye ki two ma twero kelo to, ci iniang kit ma man twero turo kwede cwinyi. Medo i kom two-ni, omyero bene wulweny ki akemo, par nyo turcwiny ma latwo nyo lupacone giwinyo. Par ki lworo medde ameda pien nongo myero ibed ka longe i ot yat ka neno ludaktar mapatpat, wilo nyo nongo yat pe yot, dok adwogi me yadi mukene pe ber. Tam mapol ma bino pi two malit twero nyweno wi woko.

Watwero nongo kony ki kwene? Jo mapol gunongo kwe cwiny madit ki i lega bot Lubanga kacel ki kwano wang Ginacoya ma cuko cwinygi. Wanongo kony bene ki i mar ki cwak ma luremwa ki wadiwa miyo.

KIT MA JO MUKENE GILWENYO KWEDE KI PEKO MAN

Robert, ma tye ki mwaka 58, owaco ni: “Bed ki niye i kom Lubanga ci en bikonyi me kanyo two ma itye kwede. Leg bot Jehovah. Wek en onge kit ma iwinyo kwede. Penye pi cwiny mere maleng. Lege pi teko wek ibed matek pi jo me ot-ti dok ni okonyi me kanyo peko meno ma nongo wi opye mot.”

Robert omedde ni, “Tye me kony adada ka jo gangi giparo pi kit ma iwinyo kwede, gicuko cwinyi dok ginyuto ni gitye kwedi kare ducu. Dano acel nyo aryo gigona cim nino ki nino kun gipenyo ni, ‘Itye nining?’ Abedo ka nongo cuko cwiny ki bot lurema ma gitye i kabedo mapatpat. Gukonya matek me medde ki kanyo.”

Ka in icito ka limo laremi ma kome lit, nen kong gin ma Linda owaco: “Latwo-ni bene mito kwo calo jo mukene dok pe mito ni ebed ka lok i kom twone i cawa ducu. Pi meno, wulok i kom jami mukene ma wuloko iye jwi.”

Ki teko ma Lubanga miyo kacel ki kwecwiny ma wanongo ki i ginacoya, medo i kom kony pa wadiwa ki luremwa, watwero bedo ki gen ni kwowa konye tye, kadi bed watye ka lweny ki two malit.

Tyeng Mogo me Baibul ma Twero Konyi

Jenge i kom Lubanga.

“Ayenyo Rwot [Jehovah], ci en ogamo legana dok olara ki i kit lworo ducu ma onongo atye kwede. An lacan akok bot Rwot, ci en ogamo doga.”—Jabuli 34:4, 6.

Linda, ma waloko i kome malo-ni, owaco ni: “Pe alego ni, ‘Wek acang woko.’ Ento kare ducu abedo ka lega ni, ‘Konya wek abed matek, dok konya me kanyo twona man.’”

Nong teko ki i Lok pa Lubanga.

“Pe tye dano mo ma bedo i lobowa ma biwaco ni, ‘An koma lit.’”—Icaya 33:24.

Lwod lok i kom cikke pa Lubanga pi anyimwa. Man bimini gen, dok biweko ibedo ki teko me kanyo twoni.

Nong kony ki bot wadini ki luremi.

“Ngat ma larem bedo ki mar i kare ducu, ki dano ginywalo me nywako peko ki omegine.”—Carolok 17:17.

Elise, ma waloko i kome malo-ni, owaco ni, “Pe ibed kekeni. Ye kony ki bot luremi. Kare mogo iromo winyo calo itye keni kun itamo ni wa Lubanga bene dong pe winyi, ento pe ibed kekeni.”