Yub pi Jo me Ot—Cito ka Pwony Kacel Macalo Jo me Ot
1 Cwiny Jehovah bedo yom me neno ka jo matino gipako nyinge. (Jab. 148:12, 13) I kare pa Yecu kadi wa ‘lutino lukere ki lutino ma pud dot gumiyo pak’ bot Lubanga. (Mat. 21:15, 16) Kadi wa i kare-ni bene, miyo pak pud tye ka medde. Lunyodo, wutwero mono konyo lutinowu wek gubed ki cwiny me pako Jehovah ki mit kom i tic me pwony pa Lukricitayo nining? Kit ma kinyuto kwede i lok ma malo i kom cokke pa Lukricitayo, gin ma pire tek aye obedo lanen ma megwu. Wego mo acel oloko me ka wang lunyodo ducu ni: “Lutino pe gitimo gin ma in iwaco; gitimo gin ma in itimo!”
2 Wi lamego mo ma lunyodone gubedo jo ma gilworo Lubanga opo ni: “Pe tye ceng Abicel mo ma wacoo odiko ci wabedo ki akalakala ka wabicito ka pwony. Wan nongo wangeyo angeya ni wabicito ka pwony.” I kit yo acel-li, in itwero miyo lutinoni giniang ni tic me pwony obedo gin ma pire tek ki keto yub me cito ka pwony kacel macalo jo me ot i cabit ducu. Man miyo kare bot lutinoni me pwonye ki neno gin ma in itimo dok bene mini kare me niang jami ma tye i cwinygi, yo me timo jamigi, ki kit ma dirogi tye ka dongo kwede.
3 Pwony ma Kelo Dongo: Me wek lutino gunong mit pa tic me pwony, omyero ikonygi me yubo kit me pwonygi maber. Lamego ma kitito lok i kome-ni owaco ni: “Wan onongo pe waling alinga ka wacito kacel ki lunyodowa i ticgi me pwony. Onongo wangeyo ni watye ki gin mo me atima, kadi bed ni obedo dwongo dogola ki miyo lutino karatac mogo mere keken. Pi yubbe con i tic me pwony me cabit acel acel, onongo wangeyo gin ma nongo wabiwaco.” In bene itwero pwonyo lutinoni ka ikwanyo dakika manok i cabit ducu me yubogi pi tic me pwony. Man twero bedo i kare ma nongo wutye ka kwan kacel macalo jo me ot nyo i kare mukene mapat.
4 Cito ka pwony kacel macalo jo me ot mini kare me pwonyo lutinoni ki lok me ada. Wego mo ma obedo Lakricitayo onongo giwoto ki tyengi gin ki nyare pi mail abicel ka poko lutino karatac i gangi mogo ma tye kunnu, ka dok gidwogo bene ki tyengi. Wi nyare-ni po ni: “Babana onongo pwonya ki lok me ada en i kare ma nongo watye ka wot-ti.” (Nwo. 6:7) Walego ni in bene omyero ilim mot pi keto tic me pwony i yub pi jo me oti i cabit ducu.