Yub pa Jo me Ot—Ginacoya me Nino Ducu
1 Lunyodo ma lumar giyelle matek nino ki nino me nongo cam pi lutinogi. Miyo cam me cwiny ma a ki i Lok pa Lubanga aye pire tek makato. (Mat. 4:4) Yo acel ma itwero dongo kwede miti me cam me cwiny i cwiny lutinoni wek ‘gudong nio i larre’ aye me kwanyo kare nino ducu me kwano ginacoya me nino ducu ki lok ma tye iye kacel macalo jo me ot. (1 Pet. 2:2) Ibiketo cawa mene i yub pa jo me oti?
2 I Kare me Cam: Yabo ninowu ki nyamo ginacoya me nino ducu twero konyo jo me oti me tamo pi Jehovah i nino meno. (Jab. 16:8) Mego mo acel omiyo odoko ticce me kwano ki nyamo ginacoya kacel ki lok ma tye i latin buk meno ki wode i kare me cam me odiko ki dok me lega kacel kwede bene ma nongo peya en ocito i cukul. Man okonyo wode me cung matek me kwero tim man me maro lobo-ni, nyo tim me tarwang, kacel ki me miyo lok me caden ki nwang cwiny bot lutino kwan kacel ki lupwonye bene. Kadi bed ni en onongo tye kene macalo Lacaden i cukul, en pe omedo ki paro ni etye kene.
3 Ka nyamo ginacoya-ni pe tiyo maber odiko, ci wuromo kwanone macalo jo me ot i otyeno, twero bedo i kare me cam me otyeno. Jo mukene bene gitito jami ma otimme i komgi i kare ma nongo gitye ka pwony ki jami ma gunongo ni ber i kwano Baibulgi pigi ken-gi en i kare me cam-mi. Jo mapol wigi po mada i kom kwan ma kikwano i kare me cam-mi calo kare me yomcwiny madit ma gilimo kacel macalo jo me ot.
4 I Dyewor: Pi jo me odi mukene, cawa maber me nyamo ginacoya me nino ki nino bedo i cawa ma nongo gimito cito ka buto. Man bene twero bedo cawa maber atika me lega kacel. Ka lutinoni giwinyo iloko i kom Jehovah kun ilego bote nino ducu, ci Jehovah doko ngat ma pire tek i kwogi.
5 Walego ni Jehovah ogoo laa i kom yelleni me keto lok me ada i cwiny lutinoni kun nongo itiyo maber ki Examining the Scriptures Daily.