Pe Dong Kibinyamo Ginacoya me Nino Ducu i Cokke me Cito i Tic me Pwony

I kare mukato angec, cokke me cito i tic me pwony onongo giromo nyamo iye ginacoya me nino ducu kace lokke orwatte ki tic me pwony. Man dong kibilokone woko. Dong pe omyero kiti ki buk me Examining the Scriptures Daily pi nyamo lok i cokke me cito ka pwony. Kit ma con-ni, jo ma gidoro cokke meno giromo tic ki Baibul, Ticwa Me Ker, buk me Ministry School, buk me Reasoning ki bukkewa mukene ma loko i kom tic me pwony. Jo ma kicimogi me doro cokke man omyero guyubbe me nywako gin mo ma twero bedo me kony bot dano ma gitye ka cito i tic me pwony i nino meno. Calo kare mukato angec, cokke meno myero oter dakika 10 nio i 15 dok bene obed cek loyo ka olubo kor cokke mukene.