Miyo Caden i Yo Maber i Kabedo ma Guro wi Dano Mapol

1. Lukricitayo me kare-ni gimiyo caden i kabedo ma guro wi dano mapol kun gilubo lanen pa Lukricitayo me cencwari me acel nining, dok man okelo adwogi ango?

¹ Lukricitayo me kare-ni ginywako lok me kwena maber-ri ki dano i kabedo mo keken ma dano nonge iye kit macalo lupwonnye pa Yecu me kare macon gutimo kwede. (Tic 16:13; 17:17; 20:20, 21) Macalo adwogi me tutegi me miyo caden i kabedo ma guro wi dano mapol, gin tye ka nongo jo ma gitye ki miti ma onongo gwok pe giromo nongogi i tic me pwony i dog ot ki dog ot.

2. Pingo ryeko mitte ka watye ka miyo caden i kabedo ma guro wi dano mapol, dok watwero miyo ticwa woto labongo anyobanyoba nining?

² Ryeko mitte ka watye ka miyo caden i kabedo ma guro wi dano mapol. Pol kare, bedo ber me tic i wi ryeko ma weko dano mapol pe ngeyo. Me labolle, ka lutit kwena mapol ata gitorre ka miyo caden en i kabedo acel-li nyo i kabedo me biacara acel moni keken, jo mukene pe gimaro ka guneno ni gitye mapol dok tutwal. Man dwoko rwom me ticwa piny dok romo balo miyo cadenwa i yo maber. Dong ngo ma waromo timone wek gin macalo man pe otimme? Kacokke mogo ma gidwong ki kabedo ma guro wi dano mapol, ginongo ni ber me poko kabedo magi me bedo wang tic mapat pat. (1 Kor. 14:40) Medo i kom meno, ka watiyo i wang tic pa kacokkewa keken ci miyo ticwa woto labongo anyobanyoba nikwanyo ka nongo Lukomitti ma Neno wi Tic me Kacokke guyubo yub mo mapatte pi konyo kacokke mukene.—Nen Our Kingdom Ministry me Dwe me Aparacel mwaka 1998, p. 6, para. 18-19.

3. Lutit kwena mukene ginongo ni yo ango maber me cako lok bot dano ka gitye ka miyo caden?

³ Kit me Cako Lok Bot Dano: I kare ma Yecu oloko ki dako mo i wang it, en ocako lokke i yo macek ka dong omedde ki lokke i kare ma dako meno onyuto miti me winyone. (Jon 4:7-26) Cako lok i yo macek ma kit meno bene tiyo maber i kare-ni i kabedo mogo. Lutit kwena mukene ginongo ni cwalo kare mo manok me moto dano ma peya gidonyo i lok kom Ker-ri, obedo yo maber me cako miyo caden botgi. Gikelo lok kom gin mo ma nongo dano gimito ngeyone matek i kabedo meno ci miyo gidonyo i gwenyo tam kwedgi. Ka jo mogo gitye ka tito tamgi, ci gin giling giwinyo maber adada. Ka dong gicako nywako kwedgi Lok pa Lubanga ma kelo kwe cwiny.—Rom. 15:4.

4. Watwero dongo miti pa jo ma nongo waloko kwedgi nining?

⁴ Dongo Miti: Omyero watemme me yubo yub mo me dongo miti pa ngat moni-ni teke ka watye ka lok kwede. Watwero timo man nining? Ka nyamo lok dong cok tum, iromo kwanyo latin bukki me coyo lok piny ci iwaco ni: “Cwinya obedo yom me gwenyo tam kwedi. Itamo ni pud dok waromo medde kwede i nino ma lacen?” Nyo ni: “Onongo amito ni ikwan buk mo ma angeyo ni biyomo cwinyi tutwal. Aromo kelone i paconi nyo ka ma itiyo iye?” Lutit kwena mukene gipenyo ni: “Iromo waca namba cimmi?” Pol kare dano giye tam meno.

5. Omyero wabed ki miti ango ka watye ka miyo caden i kabedo ma guro wi dano mapol?

⁵ Pol pa jo ma nongo kikwongo cako miyo caden botgi ki i kabedo ma guro wi dano mapol guye kwano Baibul. Kwan ma kit meno kiromo timone ki i paco pa ngat meno, ka ma en tiyo iye, kadi i kabedo mo ma opore, nyo ki cim. Pi meno, omyero wawek obed mitiwa me cako kwano Baibul ki dano ma nongo wamiyo caden botgi i kabedo ma guro wi dano mapol.