Miyo Caden i Teng Gudo i Yo ma Gudo Cwiny

1. Yo acel ango ma watwero poro kwede Yecu?

¹ I kare ma Yecu tye i ticce pe pwony i lobo, en pe obedo ki akalakala mo me lok bot dano mo keken ma en orwatte kwedgi i yo ki i kabedo mogo ma guru wi lwak mapol. (Luka 9:57-61; Jon 4:7) En onongo mito nywako kwenane ma pire tek ki dano mapol. I kare-ni, miyo caden i teng gudo obedo yo acel me konyo dano mapol wek gunong ryeko ma a ki bot Lubanga. (Car. 1:20) Ticwa me pwony biwot maber ka wacako lok kun watiyo ki diro.

2. I yo ma nining ma wan aye myero wacak kwede lok i teng gudo?

² In Aye Icak Lok: Pol kare ka wan aye wacako lok ki dano dok bedo ber loyo ka wabedo nyo wacung acunga kun wakuro ni gin aye gucak lok kwedwa. Bwuny, kun iwoto ki neno wang ngat meno, lok ma komi opye dok ki cwiny me lirem. Ka wutye ka tic ki lutit kwena mukene, bedo ber ka wucako lok ki dano ki acel acel. Myero bene wutute me moko nino wek wurwatte doki pi nywako lok kacel ki ngat ma onyutu miti-ni. Ka twere, i nge lokwu iromo penyo ngatti kit ma itwero rwatte kwede doki. Lutit kwena mogo gimiyo caden i kabedo acel moni keken, ma miyo giloko bot jo ma i kabedo meno tyen mapol dok gidongo mitigi.

3. Waromo miyo caden ki diro nining ka watye ka tic i teng gudo?

³ Ti ki Diro: Ti ki ryeko ka wutye ka moko ka ma myero wucung iye ki nga ma myero wulok kwede. Pe mitte ni myero wami caden bot dano ducu ma tye ka kato i yo. Bed ki wang mabit. Me labolle, ka dano mo tye ka rune ki wot bedo ber ka wamine kare wek okati. Ka watye ka miyo caden ka ma kitimo iye biacara, ti ki ryeko wek ladit tic pe obed ki tam mo mapat i komwa. Bedo ber ka wamiyo caden bot jo ma dong gitye ka kato woko ento pe jo ma gitye donyo i ot biacara. Cak lok bot dano i yo ma pe kelo lworo botgi. Dok bene ti ki diro ka itye ka miyo bukke. Ka dano moni onyutu miti manok, iromo miyo trak ma ka miyo magajin.

4. Pingo miyo caden i teng gudo obedo yo maber me miyo caden?

⁴ Miyo caden i teng gudo konyowa me coyo kodi madwong me ada i kare manok keken. (Latit. 11:6) Jo mukene ma warwatte kwedgi giromo bedo jo ma nongo pe wanongogi paco ka watye ka tic i ot ki ot. Pingo pe wayubbe bene me miyo caden i teng gudo, ma obedo yo maber me tic me pwony?