Kwano Baibul ki Lutino Kwan i Yo ma Weko Gidongo
Bute me 11: Konyo Lutit Kwena Manyen Wek Gudok Cen ka Lim
1 Ka latin kwan me Baibul dong ocako tito lok me kwena maber-ri, en binongo jo ma nongo ginyuto miti i lok man. Watwero konyo latit kwena manyen man me cako dok cen ka lim i yo maber nining?
2 Yub me dok cen ka lim cakke i nino me lok ki dano moni-ni tyen mukwongo. Cuk cwiny latit kwena manyen-ni me bedo ki miti i kom jo ma en oloko kwedgi. (Pil. 2:4) Pwonye me ngeyo kit me nongo tam ma tye i cwiny jo ma en loko botgi, kun nongo winyo kit ma gin giloko kwede. Ka ce ngat mo onyuto miti, ci wek latit kwena manyen-ni oco woko piny. Wek en oti ki lok ma en ocoyo piny-nyi me konye me yubbe pi nyamo lok i nino ma lacen.
3 Yubbe me Dok Cen ka Lim: Nenu gin ma latit kwena manyen-ni ocoyo piny, ci nyutte kit me yero lok mo i kom Ker-ri ma bikelo miti bot ngat ma en oloko kwede-ni. (1 Kor. 9:19-23) Wuyub lapor mo ma wukwanyo ki i paragraf acel ki i buk mo ma kiyubo me kwano Baibul kun wukwano tyeng acel ki i iye. Medo i kom meno, wuyub bene lapeny mo ma wubipenyone i agikki ma weko wudok cen me nyamone i nino ma lacen. Nyut ki latit kwena manyen-ni kit ma en twero bedo ka medo kwede ngec pa ngat ma onyuto miti i Lok pa Lubanga-ni teke ka en odok ka limme.
4 Ber ipwony latit kwena manyen-ni wek onge kit me cako lok i yo mayot ka ce en odok cen ka lim. I yo nge moto won ot, en twero wacci: “Cwinya obedo yom me lok kwedi nino ca, dok adwogo tin ka nywako ngec mukene ma tye i Baibul i kom [loki i kom gin ma obicito ka neno].” Omyero ipwony bene latit kwena manyen-ni wek onge kit ma en twero cako kwede lok ki ngat mukene ka ce wunongo ngat ma onongo onyuto miti-ni peke gang.
5 Dok Cen Kit ma Wucikke Kwede: Cuk cwiny latit kwena manyen-ni me nyuto lanen maber me dok ka limo jo ma gunyuto miti ma lubbe ki kit ma gucikke kwede. Nongo dano i pacigi kare mogo mito diyo cwiny me bedo ka dok cen kare ducu. Pwony latit kwena manyen-ni wek onge kit me moko cikke me dok cen ka lim, dok ikonnye me niang ber pa dok cen i kit ma nongo gucikke kwede. (Mat. 5:37) Pwony latit kwena manyen-ni me bedo ki woro, kica, dok opar bene pi dano ka en tye ka yenyo kacel ki dongo miti pa jo ma tye calo romi.—Tito 3:2.