Kony Lutinoni me Dongo i Tic me Pwony
1 Lunyodo ma gubedo Lukricitayo gitye ki tic ma pire tek me pwonyo lutinogi i tic me pwony ma nongo pud gitino. Man kitwero timone i yo mapol mapatpat. Lutino mogo gitwero mako lok mogo ma tye i Baibul i wigi ma nongo bene peya giromo kwano kwan. Man twero gudo cwiny jo ma giwinyo lokwa matek. Diro me pwonygi woto ki medde ameda kit ma nongo giwoto ki dongo kwede. Wun lunyodo kono wutwero konyo lutinowu me miyo caden nining? Tam ma gitye piny-nyi gwok giromo miyo kony.
2 I nge moto mot, in iromo waco ni:
◼ “Woda, [nyinge], tye ki ginacoya mo maber atika ma en mito ni in kong iwiny.” Latinni-ni romo waco ni: “Ginacoya man ma tye i Jabuli-ni opwonya me ngeyo nying Lubanga. [Wek latin okwan nyo otit lok ma tye i Jabuli 83:18 ma en omako i wiye-ni.] Magajin magi gitito gin ma Lubanga Jehovah obitimo piwa. Aromo miyogi boti?” In itwero tweyo te lok ki tito kit ma kikonyo kwede tic man ma kitye ka timone i wi lobo ducu-ni.
3 Nyo itwero temo yo man bene:
◼ “Amoti ba. An atye ka pwonyo nyara, [nyinge], me paro pi dano ma gikwo i kabedowa-ni. En mito nyutti lok mo manok ki i Baibul.” Anyaka twero waco ni: “Yo acel ma amito konyo kwede dano aye me nywako kwedgi gen ma tye anyim ma Baibul loko pire. [Wek latin okwan nyo otito gin ma tye i Niyabo 21:4 ma en omako i wiye-ni.] Magajin magi gitito gin ma Ker pa Lubanga bitimone piwa. Atamo ni ibinongo ni kwanone mit mada.”
4 Ka watiyo ki yo ma yot me cako lok ki dano kare ducu ci weko lutino gibedo ki tek cwiny me nywako kwena maber me Ker-ri. Bedo ki kare me poro kit me lok atir dok ki dwan malongo bimiyo giloko kadi bed gurwatte ki kit dano mo keken. Yubbe maber con kacel ki miyo pwoc bikonyo jo matino magi me lok pi niyegi.
5 Pi cuko cwiny ma kit man, omiyo jo matino mapol gudoko lutit kwena ma peya kibatijagi. Cwinywa yom tutwal me neno lutinowa ka gitye ka dongo i yo me pwony pa Lukricitayo!—Jab. 148:12, 13.