Tito Kwena Maber Bot Dano Ducu ma Twero Nonge
1. Gin ango ma Lukricitayo macon gutimo me miyo ngec me kwena maber-ri bot dano ducu ma gitwero nongone?
1 Lulub kor Yecu macon gutemme ki tekogi ducu me yaro kwena me Ker-ri. Gin gubedo ka tic ki yo maber me konyo dano wek lok me kwena maber-ri ongene bot dano ducu ma twero nonge. Lukricitayo mogo ma gucoyo Baibul gutiyo ki leb Grik ma obedo leb ma kingeyo i lobo ducu ma onongo tye ite Loc pa Jo Roma. Medo i kom meno, lutit kwena me cencwari me aryo ki adek me K.M. cito kwede anyim aye gwok gukwongo tic ki codex, coc me kare macon ma kicako yubone calo buk me kare-ni ma onongo yabone yot makato yabo buk adola.
2, 3. (a) Icaya 60:16 tye ka cobbe nining i kare-ni? (b) Kitye ka tic ki tet me kare-ni nining me yaro woro ma tye atir?
2 Tic ki Tet me Kare-ni: Jehovah otito wacon kun tiyo ki lanebi Icaya ni: ‘Ibibedo ka doto cak pa jo me loboni.’ (Ic. 60:16) Ginacoya man tye ka cobbe i karewa-ni i kom lutic pa Jehovah ma gitye ka tic ki jami mabeco pa jo me lobo-ni me yaro tic me pwony. Me labolle, i mwaka 1914, Lukwan mo me Baibul gucako tic ki cinema ma onongo dong nyuto cal ma woto dok tye ki kala kacel ki dwan ma winye, i kare ma dano onongo pud peya gutiyo ki kodi cinema ma kit man. Cinema man ma gilwongo ni “Photo-Drama of Creation” ma nyutone onongo tero cawa aboro kulu-ni, otiyo matek me miyo caden bot dano milion mapol.
3 I kare-ni, lutic pa Lubanga gitiyo ki cuma mogo ma timo tic oyotoyot kacel ki jami tic mapol ma tiyo ki kompiuta me goyo Baibul ki bukke me Baibul mapol i leb makato miya woko. Gitiyo bene ki giwot ma giwoto oyotoyot me cwalo bukke me Baibul magi bot dano i lobbe mapat pat 235 kulu. Jehovah tiyo ki cwiny mere maleng me konyo luticce wek guti ki tet ma kit magi pi yaro lok ada me Baibul wek ongene bot dano mapol ma loyo kare mo keken ma okato angec.
4. Jo mogo gutimo ngo me wek giyar lok me kwena maber-ri bot dano mapol?
4 Loko Yo me Kwo: Luworo me ada guloko yo me kwogi wek gibed ki kare me tero kwena maber-ri bot dano mapol. Jo mapol guloko yo me kwogi me wek gibed ki kare muromo me tiyo tic me pwony. Jo mukene gicito ka tic ka ma lutic me Ker-ri gimitte iye tutwal. Jo mukene gumedo ticgi ki pwonyo leb mukene mapat ki megi.
5, 6. Gin ango ma watwero timone wek waniang dano mapol ma waromo nongogi ma gitye i wang ticwa?
5 Medo i kom meno, wan watwero tero lok me kwena maber-ri bot dano mapol makato ka wacito ka pwony i kare ma nongo dano gitye i pacogi ki i kabedo ka ma dano twero nonge iye. Ka dano me wang ticwu pol kare pe gibedo i pacogi i dyeceng, ci pe itwero loko yubbi me miyo caden i cawa me otyeno? Mono tye kabedo mogo ma guru wi dano mapol ma itwero miyo iye lok me caden? Tika dong itemo miyo caden ki cim nyo itiyo ka ma gitimo iye biacara? In mono dong ikwanyo kare me miyo caden ma nongo pe iyubbe pire?
6 Nywako tic ma pire tek me miyo caden i kom nying Jehovah ki Ker-re pud dong obedo mot madit atika ma watye kwede ya! Pi meno, dong wamedde wunu anyim ki nywako lok me ada ma tye i Lok pa Lubanga ki jo mapol ma waromo nongogi.—Mat. 28:19, 20.