‘Tim Jami Ducu pi Lok me Kwena Maber-ri’
1. Latit kwena me Ker tye atera me timo ngo pi jo mukene, dok pingo?
1 Lakwena Paulo onongo ngeyo ni etye ki tic me tito kwena maber-ri bot jo mukene. (1 Kor. 9:16, 19, 23) I yo acel-lu bene, miti ma watye kwede ni dano myero gunong kwo ma pe tum miyo watute matek i nywako kwena maber-ri kwedgi.
2. Ka watye ka tito kwena, omyero wabed atera me timo alokaloka ango, dok pingo?
2 Pwony i Cawa ki Kabedo ma Dano Nonge Iye: Lamak rec maryek pe bolo obwone i cawa ki kabedo ma nongo rwatte bote, ento bolo i kabedo ki cawa ma en twero mako iye rec. Wan macalo “lumak dano,” bene pore piwa me keto yubwa ma rwatte wek wanong dano i wang ticwa pi nongo yomcwiny i tic man me ‘mako kit kwai rec ducu-ni.’ (Mat. 4:19; 13:47) Mono waromo tic i cawa me otyeno pi limo dano i gangigi nyo odiko con pi miyo caden i teng gudo? Pulan pa Paulo onongo tye me ‘tito kwena maber-ri kore ki kore,’ dok otiyo ki kare ma ononge me timone.—Tic 17:17; 20:20, 24.
3, 4. Ka watye i tic me pwony, i yo ma nining ma waromo loko kwede lokwa, dok man kelo adwogi ango?
3 Lok Kit me Lokki ma Lubbe ki Miti: Lumak rec pol kare giloko yo ma gitiyo kwede ma lubbe ki kit rec ma gimito makone. Wan waromo tito kwena me Ker-ri ki lok ma gudo cwiny dano i wang ticwa nining? Omyero wacak te lokwa ki jami ma miti pa jo ma giwinyowa tye iye dok waket tamwa me winyo lokgi i kom lok meno ki diro. (Yak. 1:19) Waromo penyo lapeny ma golo lok ki i cwinygi. (Car. 20:5) I yo ma kit man, bimiyo waloko kit ma watito kwede kwena maber-ri i yo ma gudo cwinygi. Paulo olubu “kit ducu ma dano gitye kwede.” (1 Kor. 9:22) Loko kit me lokwa obedo gin ma pire tek i gudo cwiny dano.
4 Nywako “lok maber me gin maber” ki dano pud dong kelo yomcwiny ya! (Ic. 52:7) Pi meno, ‘tim jami ducu pi lok me kwena maber-ri’ wek ilok ki dano mapol kit ma twere kwede.—1 Kor. 9:23.