Kwano Baibul ki Lutino Kwan i Yo ma Weko
Gidongo Bute me 12: Konyo Lutino Kwanwa me Cako Pwony ki Kwano Baibul ki Dano
1 Ka lutino kwanwa me Baibul gucako wot i tic me pwony, kine mukene gibedo ki lworo me cako kwano Baibul ki dano pigi kengi. Yo ango ma watwero konyogi kwede me bedo ki tek cwiny i ticwa man ma pire tek-ki?—Mat. 24:14; 28:19, 20.
2 Pol kare, ka latin kwan me Baibul moni odoko latit kwena ma peya onongo batija, nongo dong en odonyo woko i Cukul me Tiokraci. Pwony ma en nongo ki i yubbe kacel ki miyo pwony ma nongo kimiye bikonye me dongo diro me pwonye ma miyo en doko “latic ma pe ki gin mo ma lewic myero omake iye, ma tero lok me ada i yo atir.”—2 Tem. 2:15.
3 Pwonye ki Lanen ma Megi: Yecu opwonyo lupwonnyene kun tito botgi gin ma myero gutim ka dok bene onyuto botgi lanen matir. En owaco ni: “Dano ducu ka dong gipwonyogi maber, gibidoko macalo lapwonygi.” (Luka 6:40) Poro Yecu ki miyo lanen maber i ticci me pwony obedo gin ma pire tek. Ka latin kwanni neno ticci maber me pwony, ci en biniang ni tyen lok ma miyo kidok cen ka lim obedo me cako kwano Baibul ki dano.
4 Tit bot latin kwanni ni ka wacako kwan ki dano, pe ber me tito yub ma mako kwan-ni woko matut. Pol kare ber me nyuto kit ma kikwano kwede ki kwano paragraf acel nyo aryo mo i buk ma nongo wumito kwanone-ni. Tam mogo ma kimiyo me timo man nonge kany i pot karatac 8 ki i pot karatac 6 me Our Kingdom Ministry me Dwe me Acel mwaka 2002.
5 Ka twere, wot kacel ki latin kwanni-ni nyo wek guwot ki latit kwena mo mukene ma tye ki ngec me kwano Baibul ki dano. En bene twero lok manok i kom paragraf nyo i kom ginacoya ma pire tek. Pi meno, ka latin kwan-ni bedo ka neno kit ma wupwonyo kwede, ci bipwonye maber i kit me kwano Baibul ki dano i yo ma miyo gidongo. (Car. 27:17; 2 Tem. 2:2) Miye pwoc, dok wunyam kwede gin ma myero en otim wek odong pwonnye.
6 Pwonyo lutit kwena manyen me doko jo ma pwonyo Lok pa Lubanga bimiyo giyubbe pi ‘tic maber’ me cako kwano Baibul ki dano pigi kengi. (2 Tem. 3:17) Pud dong obedo yomcwiny madit atika me tic kacel kwedgi me cwalo lwongo me mar ni: “Wek ngat ma mito bene omat pii me kwo labongo wel”!—Yabo. 22:17.