Yub Manyen pi Gure me Nino Acel

Wang obedo gin mo ma kiyubo i yo me aura mada. (Jab. 139:14) Kadi bed kit meno, wang twero neno gin mo acel keken i cawa moni-ni. Man obedo lok ada kadi bed iter atir atir nyo calo carolok. Me bedo ki wang ma pe mito jami me kom mapol, myero waket cwinywa i timo miti pa Lubanga. Kit ma jami mapol ma balo tam pa dano tye ka medde ameda i lobo pa Catan-ni, wi lok me gure me nino acel pi mwaka 2006 ma tye ni “Bed ki Wang ma Pe Mito Jami me Kom Mapol”! tye ma opore mada.—Mat. 6:22.

Wan watwero timo gin ango wek wanong mot mapol ki bot Jehovah? (Car. 10:22) Lapeny man kibigamone i pwony ma wi lokke tye ni, “Nong Mot Mapol pi Bedo ki Wang ma Pe Mito Jami me Kom Mapol.” I yub me penyo dano mogo, kibinyuto kit ma wan watwero keto kwede cik ma iye lac me Ginacoya i tic. Wi lok me pwony mukwongo ma omego mo ma obibino ka lim bimiyone tye ni, “Bed ki Wang ma Pe Mito Jami me Kom Mapol i Lobo Man Marac-ci,” lok man bicikowa i kom jami ma twero balo kwowa kacel ki kwowa me cwiny bene. Wabipwonyo ngo ma yero “dul maber” kwako.—Luka 10:42.

Yo ango ma lunyodo kacel ki jo mukene gitwero cuko kwede cwiny Lukricitayo ma pud gubedo jo matino me keto cwinygi i yenyo jami me cwiny? Pwony ma wigi tye ni, “Lunyodo ma Gipimo Aterogi Atir Ka ma Mitte” ki “Bulu ma Gitiyo Matek pi Yubgi me Anyim me Cwiny” bene bimiyo wawinyo lok ma a ki i dog lunyodo kacel ki bulu i kom lapeny magi. (Jab. 127:4) Pwony me agikki ma omego ma obibino me limowa bimiyone, binyutiwa kit ma wan ki acel acel, nyo macalo luot, nyo kacokke watwero dongo kwede i dul pa Jehovah.

Kadi bed ni onongo pud wacako tic pi Jehovah acaka nyo dong watiyo pi mwaki mapol, pire tek ni omyero ‘wabed ki wang ma pe mito jami me kom mapol.’ Yub me gure me nino acel-li bikonyowa me timo man.