Yub me Gure me Nino Acel pi Mwaka 2010
1. (a) Wi lok madito mene ma a ki i Ginacoya ma kimiyogi i gure me nino acel i mwaki mukato angec? (b) Tika inongo pwony mogo ki i gure me nino acel ma gukato-ni ma okonyi i ticci me pwony?
1 “Wupwo Gin Maber Makato,” ‘Wucung Matek Calo Lwak Acel,’ ‘Wumedde ki bedo Caden me Lok Ada,’ ki “Wan Wabedo Lobo Agulu—Jehovah Aye Lacwecwa.” (Pil. 1:9, 10, 27; Jon 18:37; Ic. 64:8) Magi aye gubedo wi lok mogo madito i kin mapol ma dong kityeko miyogi i gure me nino acel ma gukato angec. In tika itye ki miti me bedo tye i gure me nino acel ma bibedo i mwaka 2010 me ticwa-ni? Wi lokke tye ni: “Kare Dong Odoko Ding,” kikwanyo ki i 1 Jo Korint 7:29.
2. Waromo dongo miti me bedo tye i gure man nining?
2 Cak dongo miti pi yub me gure me nino acel-li ka teke kitito nino dwe-ne i kacokkewu. Lunyodo mukene gikonyo lutinogi me bedo atera pi yub me gure man ki coyo nino dwe-ne i kalenda, ryeyo jami mogo ma mitte pi yub me gure, kun nongo giwoto ki gweto nino mudong nio wa i nino man. I otyeno me Woro pi Jo me Ot, wuromo wot wiye wiye i pwony ma wucoyogi piny i kare me gure me nino acel mogo ma gukato angec. Wuromo bene yubo cwinywu pi yub man ki nyamo wiye wiye ngec ma tye i buk me Benefit From Theocratic Ministry School Education, pot karatac 13-16, me konyo in ki jo me odi wek “wugwokke kit ma wuwinyo ki lok.”—Luka 8:18.
3. Watwero nongo adwogi maber ki i jami ma kibipwonyogi nining?
3 Ket Gin ma Ipwonyo i Tic: Ka yub me gure otum pol kare dano wacci, “Gure man pud dong obedo magwa ya!” Meno gire lok ada pien man obedo lonyo acel i kin mapol ma oa ki bot Jehovah. (Car. 10:22) Wek ngec man onyak nyige, omyero ilwod lok iye dok imak i wii. (Luka 8:15) Ka wutye ka dok paco i nge yub me gure, wunong kare me nyamo jami ma kipwonyo macalo jo me ot nyo ki jo ma wutye kwedgi i mutoka acel. Wunyam yub me cwiny pa dano acel acel ki lok ma pigi tego ma romo konyowu i ticwu me pwony. Timo meno bikonyowu me nongo adwogi maber pi kare malac ki i ngec ma kimiyo i nge yub me gure.—Yak. 1:25.
4. Pingo yub me gure man bibedo gin ma pire tek botwa?
4 Pol kare cwinywa bedo yom ka kiminiwa mic ma konyowa. Tika watye ki miti madwong me kuro jami ma Jehovah oyubo piwa i gure me nino acel ma tye ka bino-ni? Wageno ni wabinongo adwogi maber ki i gure man i yo mapat pat. Wageno bene ni wabinongo mic ma konyo ki i cuko cwiny kacel ki pwony ma miyo wamedde ki timo tic ma Jehovah Wonwa me Polo omiyo botwa.—2 Tem. 4:2; Yak. 1:17.