Kit me Cako Kwan ki Buk me Baibul Pwonyo

Pol pa wan wabedo ki yomcwiny me kwano Baibul ki dano ka onongo watwero cako kwan ki dano. Buk manyen me Baibul Mono Ada Pwonyo Gin Ango? twero konyowa. Acakki lok mukwongo ma tye i pot karatac 3-7, kiyubo i yo ma weko rwed ot donyo i nyamo lok ma tye i Baibul kun nongo kitiyo ki buk man. Kadi wa jo ma gitye ki ngec manok i tic me pwony gibinongo ni tic ki buk man yot mada me cako kwan ki dano.

◼ Iromo temo yo eni kun itiyo ki pot karatac 3:

Inge lok i kom gin mo ma otimme manyen ma tye i tam pa dano me wang ticwu, nyut lapeny ma kicoyogi ki coc ma kikwoto ma tye i pot karatac 3 bot rwed ot, ci imine kare wek olok iye. Ka iyab pot karatac 4-5.

◼ Nyo iromo cakone ki lok i kom jami ma tye i pot karatac 4-5:

Itwero wacci, “Cwinyi pe twero bedo yom ka onongo jami ma kinyutogi i cal-li gutimme?” Nyo itwero penyo ni, “I kin cikke magi ducu, mene ma cwinyi mito ni ocobbe?” Winy kit ma en dok kwede iye maber.

Ka ce rwed ot onyuto miti i ginacoya acel mo, ci nyutte ngo ma Baibul pwonyo ma mako ginacoya meno kun wuneno ki i paragraf ma nongo loko i kom ginacoya-ni ki i buk meno. (Nen bok ma tye i pot karatac ma kiluto i iye eni.) Kwanu kwede kit macalo kikwano kwede ki latin kwan me Baibul. Man twero timme i dakika abic me o i apar i nino me acel, ki i nyim doggola.

◼ Yo mukene aye me weko ngat moni miyo tamme kun itiyo ki pot karatac 6:

Nyut lapeny ma tye kipiny i pot karatac kenyo bot rwed ot, ka dong ipenye ni, “In tika itemo penye kekeni ki lapeny magi?” Ka onyuto miti i kom lapeny acel ki i kingi, ci yab paragraf ma gamo lapeny meno i buk man. (Nen bok ma tye i pot karatac ma kiluto i iye eni.) Ka wutye ka nyamo ngec man kacel, nongo dong wutye ka kwano Baibul kwede.

◼ Itwero tic ki pot karatac 7 me nyuto kit me kwano Baibul:

Kwan lain adek mukwongo ma tye i paragraf me acel i pot karatac man, ka iyab dul me 3, ci inyut kit me kwano Baibul kun itiyo ki paragraf 1-3. Dok wuyub nino ma ibidok kwede me gamo lapeny ma gitye i paragraf 3.

Kit me yubbe me dok cen: Ka wutye ka dolo te kwanwu me tyen me acel, yub yub ma weko wumedde ki nyamo lokwu i nino mukene doki. Itwero wacce ni: “Nen watyeko niang pwony ma pigi tego ma tye i Baibul i cawa manok keken. Nino mukene doki wabipwonyo lok i kom [wek lapeny mo ma wubilok iye]. Atwero dwogo boti i cawa ma kit man i cabit ma bino?”

Kit ma dong watye ka nyiko cok ki nino pa Jehovah-ni, en medde ki yubowa pi ticwa me pwony. (Mat. 28:19, 20; 2 Tem. 3:17) Pi meno dong watiyu ki buk man manyen-ni me cako kwano Baibul ki dano.

[Box on page 3]

Nyamo Ginacoya ma Tye i Pot Karatac 4-5

◻ Niyabo 21:4 (pot 27-8, para. 1-3)

◻ Icaya 33:24; 35:5, 6 (pot 36, para. 22)

◻ Jon 5:28, 29 (pot 72-3, para. 17-19)

◻ Jabuli 72:16 (pot 34, para. 19)

Lagam me Peny ma Tye i Pot Karatac 6

◻ Pingo walimo can? (pot 108, para. 6-8)

◻ Yo ango ma watwero lweny kwede ki par ma mako kit me kwo? (pot 184-5, para. 1-3)

◻ I yo ango ma watwero weko kwowa me ot bedo me yomcwiny? (pot 142-3, para. 20)

◻ Gin ango ma timme i komwa ka wato? (pot 58-9, para. 5-6)

◻ Tika dok wabineno jo me amarawa ma dong guto woko-ni? (pot 72-3, para. 17-19)

◻ I yo ango ma watwero bedo kwede labongo akalakala ni Lubanga bicobo cikke-ne pi jami ma tye i anyim? (pot 24-5, para. 17)