Tika Ibicako Kwano Baibul ki Dano i Oktoba?
1. Ngo ma wabitero i dwe me Oktoba?
1 I dwe me Oktoba wabitero magajin me Watchtower ki Awake! Me lubo kor jo ma gunyutu miti, kitye ka cuko cwinywa me nyutu trak me In Imito Ngeyo Lok Ada? kun watute me cako kwano Baibul kwedgi. Waromo timo man nining ka wadok cen ka lim?
2. Waromo tic ki trak me Ngeyo Lok Ada nining me cako kwano Baibul ka wadok cen ka limo ngat ma ogamo magajin ki botwa?
2 Kit me Tic ki Trak-ki: Waromo wacci: “Magajin ma aweko boti ca cuko cwiny dano me dini ducu me ngiyo pwony ma tye i Baibul. [Mi trak me Ngeyo Lok Ada bot rwod ot, ci inyut bote lapeny ma tye i nyimme.] Magi aye lapeny mogo ma dano gutamo iye tam matut ento Baibul miyo lagam ma kelo yengo. In tika dong ipenye ki kodi lapeny macalo magi?” I nge winyo lagam pa rwod ot, wunyam lagam me lapeny acel, dok wukwan ginacoya acel ma kicimo. Tit bot rwod ot ni man obedo ngec mogo ma Baibul pwonyo, dok imi bote buk me Baibul Pwonyo. Ci wuromo nyamo paragraf mukwongo me dul mo ma en oyero ki i lok ma tye iye. Nyo waromo yabo ka mo ki i buk man ma kubbe ki ngec ma wanyamo ki rwod ot ki i trak. Magi aye pwony mogo ma waromo tic kwedgi:
● Lubanga tika ada paro piwa? (pot 9-11, para. 6-10)
● Lweny ki peko mono bigik? (pot 12, para. 12-13)
● Ngo ma timme i komwa ka wato? (pot 59-60, para. 7-8)
● Gen mo tika dok tye pi jo muto? (pot 71, para. 13-15)
● An atwero lega nining wek Lubanga owiny legana? (pot 166-167, para. 5-8)
● An mono atwero nongo yomcwiny nining i kwona? (pot 9, para. 4-5)
3. Waromo loko kit me lokwa nining ma lubbe ki miti pa dano?
3 Ngene kene ni, ka pe watwero nyutu kit ma wakwano kwede Baibul ki dano kun nongo watiyo ki buk me Baibul Pwonyo tyen mukwongo ma wadok cen ka lim, waromo yubo nino mukene me dok cen ka medde ki nyamo lokwa. Ma lubbe ki miti pa dano moni, waromo yero me nyamo lapeny mukene ki i trak man i nino mukene ma wadok cen ka lim ma peya wanyutu buk. Walego ni wati maber ki trak man ma tye ki ngec mabeco-ni me cako kwano Baibul ki dano i dwe me Oktoba wek wakony jo ma cwinygi atir me ‘ngeyo lok ada.’—Jon 8:31, 32.