Kit me Nyuto Buk me Baibul Pwonyo
Karatac ma kiluto i iye eni tye ki tam mapol ma kimiyo i kom kit me nyuto buk me Baibul Pwonyo. Me wek tam magi oti maber, ti ki lok ma meri kun iweko bedo ma rwatte ki kwo me wang ticwu, dok omyero inge lok mogo ma tye i buk man ma itwero tic kwede me cako lok. Kit me nyutone i yo mukene maber ma rwatte ki kwo me wang ticwu bene itwero tic kwede.—Nen Our Kingdom Ministry me Januari mwaka 2005, i pot 8.
Armagedon
◼ “Ka dano guwinyo pi ‘Armagedon,’ polgi tamo ni obedo twon lweny mo ma bineko dano lumuku. Twero bedo me ur ki boti me ngeyo ni Armagedon obedo gin maber loyo ma omyero wakur pi binone ki yomcwiny? [Mine kare wek ogam. Ci ikwan Niyabo 16:14, 16.] Nen kong kit ma kwo bibedo kwede i nge Armagedon.” Yab pot karatac 82-4 ci ikwan paragraf 21.
Baibul
◼ “Pol kare dano giwaco ni Baibul obedo Lok pa Lubanga. Kong mono itemo penye ni, pingo dok kilwongo buk man ma dano aye gucoyo-ni ni obedo Lok pa Lubanga? [Mine kare wek ogam. Ci ikwan 2 Petero 1:21 ki paragraf 5 i pot karatac 19-20.] Buk man nyuto lagam ma Baibul miyo pi lapeny magi.” Nyut lapeny ma gitye i pot karatac 6.
◼ “I kare-ni dano gitye ki yo me nongo ngec mapol ma dong loyo aloya. Ento in itamo ni wan watwero nongo ngec maber ma twero konyowa me nongo yomcwiny ki kwo ma yot ki kwene? [Mine kare wek ogam. Ci ikwan 2 Temceo 3:16, 17 ki paragraf 12 i pot karatac 22-3.] Buk man tito kit ma wan watwero kwo kwede i yo ma yomo cwiny Lubanga ki adwogi maber ma wanongo ki iye.” Nyut lok ki cal ma tye i pot karatac 122-3.
To ki Nicer
◼ “Pol pa dano gipenye pi gin ma timme i kom dano i nge to. In itamo ni wan watwero ngeyone? [Mine kare wek ogam. Ci ikwan Latitlok 9:5 ki paragraf 5-6 i pot karatac 58-9.] Buk man tito kit ma cikke me nicer ma Baibul ociko-ni bicobbe kwede i kom jo muto.” Nyut cal ma tye i pot karatac 75.
◼ “Ka danowa me amara oto, nongo pud wawinyo ni wamito nenone dok aye. In pe i ye lok man? [Mine kare wek ogam.] Jo mapol dong gunongo kwe cwiny i cikke ma Baibul miyo pi nicer. [Kwan Jon 5:28, 29 ki paragraf 16-17 i pot karatac 71-2.] Dul man bene gamo lapeny magi.” Nyut lapeny ma gitye i acakki dul meno i pot karatac 66.
Kwo ma pe Tum
◼ “Pol pa dano gimito ni gibed ki yot kom dok gibed giri. Ento ka onongo twere, onongo in ibimito ni ibed nakanaka? [Mine kare wek ogam. Ci ikwan Niyabo 21:3, 4 ki paragraf 17 i pot karatac 53-4.] Buk man tito kit ma wan watwero nongo kwede kwo ma pe tum dok tito bene kit ma kwo bibedo kwede i kare ma nongo cikke man dong ocobbe.”
Kwo me Ot
◼ “Wan ducu wamito ni wabed ki kwo me ot ma yomo cwinywa. In pe i ye man? [Mine kare wek ogam.] Baibul waco gin ma ngat acel acel twero timone me kelo yomcwiny i ot—poro kit pa Lubanga me nyuto mar.” Kwan Jo Epeco 5:1, 2 ki paragraf 4 i pot karatac 135.
Odi
◼ “I kabedo mapol, nongo ot maber me bedo ma wele yot tye matek tutwal. In itamo ni i kare mo dano ducu bibedo ki odi mabeco me bedo? [Mine kare wek ogam. Ci ikwan Icaya 65:21, 22 ki paragraf 20 i pot karatac 34.] Buk man tito kit ma cikke pa Lubanga-ni bicobbe kwede.”
Lubanga Jehovah
◼ “Pol pa dano ma gitye ki niye i kom Lubanga gimito ni gibed macok kwede. In mono ingeyo ni Baibul lwongowa me nyiko cok ki Lubanga? [Mine kare wek ogam. Ci ikwan Yakobo 4:8a ki paragraf 20 i pot karatac 16.] Buk man kiyubo me konyo dano wek gunge lok mapol i kom Lubanga kun nongo gikwano ki i Baibulgi.” Nyut lapeny ma gitye i pot karatac 8.
◼ “Jo mapol gilego ni nying Lubanga omyero kilony nyo obed maleng. In kong mono itemo penye ni nyinge-ni mono obedo nga? [Mine kare me gamone. Ci ikwan Jabuli 83:18 ki paragraf 2-3 i pot karatac 195.] Buk man tito ngo ma ada Baibul pwonyo i kom Lubanga Jehovah ki yubbe pi dano.”
Yecu Kricito
◼ “Dano dong guwinyo pi Yecu Kricito i kabedo ducu me lobo-ni. Jo mukene giwaco ni en mere obedo dano ma ngene ci otum. Jo mukene giwore macalo Lubanga Won Twer Ducu. In mono itamo ni kit ngec ma nongo watye kwede i kom Yecu Kricito obedo gin ma pire tek?” Mine kare wek ogam. Ci ikwan Jon 17:3 ki paragraf 3 i pot karatac 37-8. Nyut lapeny ma gitye i acakki me dul man.
Lega
◼ “In mono nino mo itemo penye i kom kit yo ma Lubanga gamo kwede lega? [Mine kare me gamone. Ci ikwan 1 Jon 5:14, 15 ki paragraf 16-18 i pot karatac 170-2.] Dul man bene tito pingo omyero waleg bot Lubanga ki dong ngo ma omyero watim wek en owiny legawa.”
Dini
◼ “Dano mapol dong gucako neno dini me lobo-ni calo gin ma okelo pekki ma dano gitye kwede-ni ento pe calo ni gin ma giko agika. In itamo ni dini mono tye ka telo dano i yo matir? [Mine kare me gamone. Ci ikwan Matayo 7:13, 14 ki paragraf 5 i pot karatac 146.] Dul man ngiyo jami abicel ma nyuto kit me woro ma Lubanga cwako.” Nyut jami ma tye i pot karatac 147.
Can/Peko
◼ Ka can mo opoto, jo mapol gibedo ki akalakala ka Lubanga ada paro pi dano dok neno peko ma dano gideno. In mono kong itemo penye i lok man? [Mine kare me gamone. Ci ikwan 1 Petero 5:7 ki paragraf 11 i pot karatac 11.] Buk man tito kit ma Lubanga bikwanyo kwede peko ducu ma dano gitye ka limone-ni.” Nyut lapeny ma gitye i dul ma tye i pot karatac 106.
Lweny/Kuc
◼ “I kabedo ducu dano gimito kuc. In itamo ni gen me kuc i lobo mono obedo lek mamwa? [Mine kare wek ogam. Ci ikwan Jabuli 46:8, 9.] Buk man loko i kom kit ma Lubanga bicobo kwede yubbe dok kelo kuc i lobo-ni.” Nyut cal ma tye i pot karatac 35 ka dok wunen paragraf 17-21 i pot karatac 34-6.
[Box on page 5]
Kit me Tito pi Yub me Miyo Mot
“Ka gwok imito miyo mot mo manok me konyo ticwa man ma mako wi lobo ducu-ni tin-ni, ci abijolo ki yomcwiny.”
“Kadi bed ni pe wacato bukkewa acata, ento pe wakwero mot mo manok ma gimiyo me konyo ticwa man ma mako wi lobo ducu-ni.”
“Iromo bedo ki ur kit ma wanongo kwede cente me tiyo ticwani. Man timme pi kony me mot ma dano gimiyo me konyo kor ticwa man ma mako wi lobo ducu-ni. Ka in bene imito miyo mot mo tin-ni, ci abijolo ki yomcwiny.”