Video ma Nyuto Alokaloka ma Tye Katimme i Yo me Tero Lutwo
Lungolkop kacel ki ludaktar dong gitye ka temme me gwoko twero ki tam pa lutwo. Man okelo yo manyen me cango lutwo ma Lucaden pa Jehovah bene gitwero nongo adwogi maber ki iye. (Tic 15:28, 29) Meno aye obedo gin ma video me Transfusion-Alternative Health Care—Meeting Patient Needs and Rights loko iye. Omyero wunen ci wutem dok wiye wiye i kom gin ma wupwonyo ki iye.—Ngec manok: Kit ma video man nyuto ka mogo ma kitye ka yango i ye dano-ni, lunyodo omyero guti ki ryeko ka gitye ka nenone ki lutinogi matino.
(1) Pingo ludaktari mukene gitye ka loko tamgi i lok me medo remo i kom dano? (2) Mi lapor adek mapat pat me yango mogo matego ma kitwero timone labongo medo remo. (3) Ludaktari adi i lobo-ni ma dong gunyuto mitigi me tic i kom lutwo labongo medo remo i komgi? Pingo mitigi tye me tic kumeno? (4) Ngo ma kingiyo mot i odi yadi ci kinongo, i lok madok i kom tic ki remo? (5) Peko ango ma bino macalo adwogi me medo remo? (6) Tam ango ma ludaktari madongo gumoko ma dok i kom adwogi maber ma bino pi medo jami mogo ma obedo pii pii i kom dano? (7) Gin ango ma weko remo doko nok i kom dano? Dok dano twero bedo kwede pi kare ma rom mene? Gin ango ma kiromo timone me medone? (8) Gin ango ma kiromo timone wek kom latwo omed tekone me yubo remo? (9) Diro ango ma kitye ka tic kwede me wek remo pe oony mapol i kare me yango? (10) Jami ma obedo pii pii mono twero tic maber kadi wa i kom lutino matino nyo i kom jo ma nongo dong kwogi tye ka ma ding ma nongo gimito akonya oyot? (11) Gin me acel ma pire tek madok i kom tic maber i kom lutwo obedo ngo? (12) Pingo pire tek ni Lukricitayo omyero guyer woko con yo mene ma kibitic kwede i komgi labongo remo? Dok waromo timo man nining?
Me yero yo mogo ma kitiyo kwedgi ma kinyutogi i video-ni cung i wi dano acel acel kun nongo lubbe ki kit ma cwinye tele kwede. In dong ityeko moko yo ma pe kitiyo iye ki remo mene ma itwero ye ni kiti kwede i komi ki lutinoni? Jo me otwu ma pe gubedo Lucaden bene omyero gunge tammi man maber ki pingone.—Nen “Questions From Readers” (Lapeny ma A ki bot Jo ma Gikwano Bukkewa) ma tye i Watchtower me Juni 15, mwaka 2004, ki me Oktoba 15 mwaka 2000.