Pud Itye ka Galle?

Galle ki timo ngo? Ki pongo kad me DPA (durable power of attorney) nyo AMD (Advance Medical Directive) ma kimiyo pi Lucaden ma dong gunongo batija woko. Kit macalo ‘pe ingeyo gin ma bitimme i kwoni diki-ni,’ pire tek ni omyero imok tammi con dok iket woko i coc i kom yo ma in iye ni kiti kwede i komi ka gwok nyo jami calo awano-gi otimme atura. (Yak. 4:14; Tic 15:​28, 29) Me konyi, kityeko yubo vidio me Transfusion-Alternative Health Care​—⁠Meeting Patient Needs and Rights. Wunen vidio man maber ci wunyam lok i kom jami ma wupwonyo ki iye kun wutiyo ki lapeny ma kiketogi piny kany, dok wuket obed i lega.​—⁠Ngec manok: Kit ma vidio man nyutu ka mogo ma kitye ka yango iye dano-ni, lunyodo omyero guti ki ryeko ka gitye ka nenone ki lutinogi matino. Ka ma vidio man pe iye, wunyam lok ma tye i “Lapeny ma A ki bot Jo ma Kwano Bukkewa” i Watchtower me Juni 15, 2004 ki me Oktoba 15, 2000, nyo “In Mono Itye Atera me Kemme ki Gin mo ma Timme i Komwa ma Mito Ot Yat dok Temo Niyewa?” ma tye i Our Kingdom Ministry me Novemba 1990.

(1) Pingo ludaktar mukene gitye ka loko tamgi i lok me medo remo i kom dano? (2) Mi lapor adek mapat pat me yango mogo matego ma kityeko timone labongo medo remo. (3) Ludaktar adi i lobo-ni ma dong gunyutu mitigi me tic i kom lutwo labongo medo remo i komgi? Pingo mitigi tye me tic kumeno? (4) Ngo ma kingiyo mot i odi yadi ci kinongo, i lok ma dok i kom tic ki remo? (5) Peko ango ma bino macalo adwogi me medo remo? (6) Tam ango ma ludaktar madongo gumoko ma dok i kom adwogi maber ma bino pi medo jami mogo ma obedo pii pii i kom dano? (7) Gin ango ma weko remo doko nok i kom dano? Dok dano twero bedo kwede pi kare ma rom mene? Gin ango ma kiromo timone me konyo ngat ma remone nok? (8) Gin ango ma kiromo timone wek kom latwo omed tekone me yubo remo? (9) Diro ango ma kitye ka tic kwede wek remo pe oony mapol i kare me yango? (10) Jami ma obedo pii pii mono twero tic maber kadi wa i kom lutino matino nyo i kom jo ma nongo dong kwogi tye ka ma ding ma nongo gimito akonya oyot? (11) Gin me acel ma pire tek pi tic maber i kom lutwo obedo ngo? (12) Pingo pire tek ni Lukricitayo omyero guyer woko con yo mene ma kibitic kwede i komgi labongo remo? Dok waromo timo man nining?

Me yero yo mogo ma kitiyo kwedgi ma kinyutugi i vidio-ni cung i wi dano acel acel kun nongo lubbe ki kit ma cwinye kacel ki ngecce me Baibul tele kwede. In dong ityeko moko yo ma pe kitiyo iye ki remo ma itwero ye ni kiti kwede i komi ki lutinoni dok ipongo kad me DPA nyo AMD? Pi ngec mukene mapol ma mako lok man, nen maber “dul me 7 i buk me “Mar pa Lubanga” kacel ki bukke mukene ma kicimo iye. Nen bene karatac ma kiluto i Ticwa Me Ker me Novemba 2006 ma wiye tye ni “An Mono Aneno Jami ma Tye i Remo ki dok Tic pa Ludaktar ma Kubbe ki Remona Nining?” Me agikkine, nen ni icoyo jami ma iyerogi maber i kad-di me DPA, ka itye ka tic ki kad me DPA. Jo ma iyerogi me cung piri i lok me ot yat kacel ki jo me otwu ma pe gubedo Lucaden omyero gunge tammi man maber.

[Bok i pot karatac 3]

• In mono dong ityeko moko yo ma pe kitiyo iye ki remo ma itwero ye ni kiti kwede i komi ki lutinoni?

• Mono iwoto ki kad-di me DPA nyo AMD ma ityeko pongone maber ka gwok nyo jami calo awano-gi ni otimme atura?