Pwony Jo ma Mwol me Lubo Yo pa Lubanga
1. Gin ango ma mitte me loko dano me doko ngat muye?
1 I cencwari me acel, jo ma gilubo kor Kricito onongo kilwongogi ni “Yo man.” (Tic 9:2) Dini pa Lukricitayo kwako yo me kwo pa ngati moni ducu. (Car. 3:5, 6) Pi meno, ka wakwano Baibul ki dano, omyero pe wapwonygi ki ngec matir me Baibul keken. Omyero bene wakony lutino kwanwa me Baibul me lubo yo pa Jehovah.—Jab. 25:8, 9.
2. Gin ango ma romo cuko cwiny latin kwan me Baibul me lubo cik pa Lubanga?
2 Maro Jehovah ki Yecu: Tek mada bot dano ma tye ki roc me weko tamme, ticce, lokke, ki kite obed ma rwatte ki miti pa Lubanga! (Rom. 7:21-23; Ep. 4:22-24) Ento mar pi Lubanga ki Wode cuko cwiny jo ma mwol me timo man kadi bed tek. (Jon 14:15; 1 Jon 5:3) Dong waromo konyo lutino kwanwa me Baibul wek gudong mar ma kit man nining?
3. Waromo konyo lutino kwan nining wek gudong mar pi Jehovah ki pi Yecu?
3 Kony latin kwanni wek onge nga ma Jehovah obedo. Omego mo acel owaco ni, “Dano pe romo maro ngat ma en pe ngeyo, pi meno, i acakki me kwanwa, apwonyo lutino kwanna me ngeyo nying Lubanga ki i Baibul, dok ayenyo yo me tito botgi kit pa Jehovah.” Yo maber me timone aye obedo nyuto kit pa Lubanga kun itiyo ki lanen pa Yecu. (Jon 1:14; 14:9) Medo i kom meno, ti bene ki lok ma gitye i bok me agikki me dul acel acel i buk me Baibul Pwonyo me konyo latin kwan me niang kit pa Lubanga ki pa Wode.
4. (a) Pingo lutino kwan mapol ginongo tito kwena tek mada? (b) Wan waromo konyo lutino kwanwa nining wek gucak tiyo tic pa Lukricitayo me pwony?
4 Pwony ki Lanenni: Macalo lupwonye ki jo ma tiro dano, omyero wapwony dano kit me lubo yo pa Lubanga ki ticwa. (1 Kor. 11:1) Me labolle, pol pa lutino kwan me Baibul pe gingiyo ki nywako niyegi ki jo ma pe gingeyo. Pi meno, diyo cwiny kacel ki diro mitte me konyogi wek gudong mar, niye, ki tekcwiny ma mitte pi tito lok me kwena kacel ki loko dano wek gudok jo muye. (2 Kor. 4:13; 1 Tec. 2:2) Miti me konyo lutino kwanwa bimiyo wawoto kwedgi i ninogi me acel me wot i tic pa Lukricitayo me pwony.
5. Lanen maber romo konyo lutino kwan me niang tyen lok me lubo cik pa Lubanga nining?
5 Lanenni romo pwonyo lutino kwan kit mukene me kwo pa Lukricitayo. Ka ilimo lutwo nyo imoto dano ki mwolo i kacokke, gin gibineno marri i tic. (Jon 15:12) Ka inywako tic me weko Ot me Ker obed maleng nyo itimo jami me konyo jo mukene, nongo itye ka pwonyogi kit me miyo kony. (Jon 13:12-15) Ka guneno ni kwoni pe mito jami me kom mapol, ci gibiniang ngo ma ‘kwongo keto cwinywa i kom ker-ri’ obedo.—Mat. 6:33.
6. Adwogi ango ma bino pi konyo jo mukene me tic pi Jehovah?
6 Tic me pwonyo dano ki Lok pa Lubanga ki me loko dano me doko jo muye mito tute matek. Ento, tye me yomcwiny adada me neno jo ma mwol ka “gitye ka lubo lok ada”!—3 Jon 4.