Pwony Jo Mukene wek Gumar Jehovah
1. Gin ango ma onyiko jo mukene bot Jehovah?
1 Wi tika po i kom tyen mukwongo ma i winyo kwede pi Jehovah? Ngo tutwalle ma onyiki cok bote? Jo mapol ma cwinygi tye atir gubiwacci ni gin ma onyikogi cok bot Lacwec obedo nongo ngec i kom kite mabeco ma lapore pe-ni, tutwalle kicane kacel ki marre.—1 Jon 4:8.
2, 3. Waromo tic ki buk me Baibul Pwonyo nining me konyo lutino kwan me Baibul wek gudong margi pi Jehovah?
2 “Man Aye Lubangawa”: Buk me Baibul Pwonyo tittiwa pi mar pa Jehovah ki dok bene tittiwa kit ma pire tek kwede me bedo ki wat macok ki en. Waromo tic ki buk man nining me pwonyo jo mukene wek gudong margi pi Lubanga? Ka wutye ka pwonyo gin mo manyen, wuromo tic ki lapeny mogo ma romo weko latin kwan tamo tam, lapeny calo: “Ada man nyutu gin ango i kom Jehovah?” nyo “I yo ango ma lok man nyutu ni Jehovah pud dong obedo Wego maber loyo ma ngat moni romo bedo kwede?” Pwony i yo ma kit man romo konyo latin kwan wek ocak bedo ki wat ki Jehovah pi kwone kulu.
3 Ka wakonyo lutino kwan me Baibul me neno kit ma pire tek kwede me nongo ngec ma a ki bot Lubanga acel me ada dok makwo, ci gibiye ada pa lok man ma tye i Icaya ma wacci “man aye Lubangawa.” (Ic. 25:9) Ka watye ka tito Lok pa Lubanga, omyero wawek guniang kit ma dano binongo kwede mot i cobbe pa yub pa Jehovah i te gamentene ma Kricito Yecu aye telo-ni.—Ic. 9:6, 7.
4, 5. Maro Jehovah te lokke ngo?
4 Gin ma Nyutu Mar pi Jehovah: Wangeyo ni maro Jehovah ki cwinywa, komwa, kacel ki tamwa ducu pe obedo gin ma wawinyo ki i cwinywa i kom Lubanga keken. Omyero walok kitwa dok walub tamme. (Jab. 97:10) Mar pi Lubanga nen ka walubu cikke kun wamedde ki bedo ki “kwo maleng ki me woro Lubanga,” kadi bed warwatte ki atematema kacel ki aunauna.—2 Pet. 3:11; 2 Jon 6.
5 Timo miti pa Lubanga pi marwa pire kelo botwa yomcwiny. (Jab. 40:8) Latin kwan me Baibul myero onge ni cik pa Lubanga ducu tye pi ber bedo pa luticce. (Nwo. 10:12, 13) Ka ngat moni kwo i yo ma rwatte ki cik pa Jehovah, ci en nongo tye ka nyutu pwoc pi tic me aura ma En otiyo. Kony latin kwan me niang ni wot i yo matir pa Jehovah konyo ngat moni pe me bedo ki arem me cwiny.
6. Mot ango ma ngat moni twero nongone pi maro Jehovah?
6 Mot pi Lumar Lubanga: Jehovah paro tutwal pi jo ma mwol ma gimarre, dok en nyutigi ‘lok ma Lubanga okano ka matut.’ (1 Kor. 2:9, 10) Gin gitye ki ngec matir pi anyim kacel ki gen ma pe tur pien dong gitye ki ngec i kom yub pa Jehovah. (Jer. 29:11) Jo ma gimaro Jehovah ginongo kicane me aura tutwal-li. (Nia 20:6) Mic me kwo ma pe tum obedo gin madit botgi pi mar pa Lubanga.—Jon 3:16.
7. In iwinyo nining i lok kom pwonyo jo mukene wek gumar Jehovah?
7 Ka wamedde ki dongo ngecwa i kom Wonwa me polo, ci miyo watito pire bot jo mukene. (Mat. 13:52) Pwonyo jo mukene wek gumar Jehovah pud dong obedo twon mot madit adada, tutwalle pwonyo lutinowa! (Nwo. 6:5-7) Pi man dong, wan ducu kacel ki lutino kwanwa me Baibul wamedde wunu ki miyo pakwa kun nongo wanongo ‘ber madwong pa Jehovah.’—Jab. 145:7.