In Mono Iromo Loko Yubbi?
1. Pingo omyero walok yubwa me cito ka pwony?
1 Macalo Lukricitayo me ada wan watyeko ye lwongo me doko “lumak dano.” (Mat. 4:19) Calo lumak rec kikome-ni wan bene wabinongo adwogi maber i tic me mako dano ka waketo yub me pwonywa bedo i cawa ma nongo waromo nongo dano. Pol pa dano gimaro bedo paco i cawa me otyeno abwora nyo ma ceng cok poto. Pol kare nongo gitye labongo tic dok bene nongo nyo giromo jolo wele. In mono iromo loko yubbi me cito kapwony i cawa magi?—1 Kor. 9:23.
2. I yo ango ma waromo pwonyo kwede jo mapol ki kwena maber-ri?
2 Miyo Caden ki Otyeno: Yubo yub me pwony ki otyeno romo miyowa kare me tito pi kwena maber-ri ki dano mapol. (Car. 21:5) Bulu bene giromo pwony ka gudwogo ki i cukul. Jo mukene-ni bene giromo timo man i nge ticgi. Gurup mogo me cokke me kwano buk bene giromo yubo yub me cito ka pwony pi cawa acel ma nongo peya gucako kwangi me cabit ki cabit.
3. I yo ango ma iromo pwony kwede i cawa me otyeno abwora nyo ma ceng cok poto ki i wang ticwu?
3 Tito lok me kwena maber-ri i doggola ki doggola ki otyeno abwora nyo ma ceng cok poto weko waromo lok ki jo ma nongo pol kare pe wanongogi paco. I wang tic mapol miyo caden i teng gudu ki ka ma nongo dano tye mapol bene kiromo timone ki otyeno. Jo mapol ginongo ni otyeno aye obedo cawa maber me dok cen ka lim ki dok cako kwano Baibul ki dano.
4. Pingo bedo ki wang ma kwiri kacel ki tamo pi dano pire tek ka watye ka miyo caden ki otyeno?
4 Niango Mitte: Bedo ki wang ma kwiri ber mada ka watye ka miyo caden i cawa me otyeno. Pol kare ber me giko miyo caden con ki otyeno me kaka cito ma nongo wegi odi dong gitye ka yubbe me buto. (Pil. 4:5) Ka idwongo doggola omyero icung ka ma kiromo neni iye dok inyut anga ma in ibedo. Omyero itit tyen lok ma okeli oyot oyot. Ka io i cawa ma pe rwatte ketti inongo luot gitye ka cam cikke me dwogo i nino mukene. Bed ngat ma tamo pi dano kare ducu.—Mat. 7:12.
5. Waromo gwokke ki i kom jami maraco nining ka watye ka pwony?
5 Omyero wagwokke ki jami ma romo kelo peko i komwa bene. Ka ceng opoto nyo piny ocido woko ber me wot ki aryo aryo nyo jo mapol pol. Wuwot i gudu ma nongo mac lyel iye ka ma nongo pe wutye wun kenwu. Miyu caden ka ma pe kitwero wanowu iye. Pe wuwot i kabedo ma romo keto kwowu ka mading ka piny dong col.—Car. 22:3.
6. Adwogi maber ango ma romo bino pi miyo caden i otyeno abwora nyo ma ceng cok poto?
6 Miyo caden i otyeno abwora nyo ma ceng cok poto romo miniwa kare me tic ki jo ma gitiyo calo painia pi tutunu ki painia marii. (Rom. 1:12) In mono iromo loko yubbi wek inywak tic i cawa man?