Lanen Maber pi Dano ma Mwakigi Pat Pat Ducu
Nua obedo ki wat macok tutwal ki Lubanga. En ojalo kwone me timo miti pa Jehovah. En ‘owoto kacel ki Lubanga’ ci onongo mot pi tic ma en otimo. Pi meno, en oweko lanen maber me aluba bot jo matino ki madongo ducu. (Acak. 6:9) Vidio me Noah—He Walked With God bikonyi me ngeyo kit ma kwo obedo kwede i kare pa Nua, gin ma omiyo en onongo mot pa Jehovah, ki kit ma in bene iromo poro kwede kite maber-ri. Ka ma vidio man pe nonge iye, kwano Acakki cura 6 nio i 9 bicuko cwinywa me lubo lanen ma Nua oweko pi Lukricitayo me ada i kare man me agikki-ni.
Vidio me Noah man ma tye i DVD tye ki lapeny magi. Nen vidio meno, nyo ka pe nonge i kabedowu, ci kwan ginacoya ma kicimo i Acakki cura 6 o kwede i 9 ka dong ipenye ki lapeny magi kekeni: (1) Gin ango marac ma lumalaika mogo gutimo, dok jo Nepil onongo gubedo jo mene? (Acak. 6:1, 2, 4) (2) Pingo dano gudoko rac tutwal, dok Lubanga owinyo nining i kom lok man? (Acak. 6:4-6) (3) Nua onongo dok pat nining? (Acak. 6:22) (4) Kityeko jo maraco nining? (Acak. 6:17) (5) Yeya-ni onongo dit rom mene? (Acak. 6:15) (6) Gin ango mukene ma Nua bene otimo, dok dano guneno nining? (Mat. 24:38, 39; 2 Pet. 2:5) (7) Kwai lee acel acel onongo gitye adi adi i yeya? (Acak. 7:2, 3, 8, 9) (8) Kot ocwer pi nino adi, dok otero kare ma rom mene ma lobo onongo pud opong ki pii aluka? (Acak. 7:11, 12; 8:3, 4) (9) Pingo Nua kacel ki luode gubwot? (Acak. 6:18, 22; 7:5) (10) Yeya-ni ogem kakwene? (Acak. 8:4) (11) Nua ongeyo nining ni onongo dong twerre pi gin me katti ki i yeya? (Acak. 8:6-12) (12) Gin ango ma Nua otimo i kare ma en okatti woko? (Acak. 8:20-22) (13) Danyu cung pi gin ango? (Acak. 9:8-16) (14) “Wot kacel ki Lubanga” te lokke ngo? (Acak. 6:9, 22; 7:5) (15) Gin ango ma omyero watim wek wanen Nua i Paradic? (Mat. 28:19, 20; 1 Pet. 2:21)
Lanen me niye ki winy pa Nua ma kicoyo i Baibul-li opwonyi nining me neno kit ma in bene iromo “wot kacel ki Lubanga” ki dok me bedo ki gen i teko pa Jehovah me laro jone me kare man?—Acak. 7:1; Car. 10:16; Ibru. 11:7; 2 Pet. 2:9.