Ticwa me Pwony—Obedo Tic me Kica
1 Yecu oneno ci onongo ni lwak jo mapol ma giwinyo lokke-ni ‘onongo kitye ka unogi matek, dok gudoko goro, calo romi ma lakwatgi pe.’ (Mat. 9:36) En opwonyogi ki cik pa Jehovah ki kica kacel ki mar, okweyo cwinygi, dok ocobo mitigi me cwiny. Ka wabedo ka lwodo lok i kom jami ma Yecu otimo, ci wapwonye me bedo calo en i yo me tamwa kacel ki paro pi dano, dok kit me kica man binen wa i ticwa me pwony.
2 Kong ikwany kare mo manok me tam i kom kit ma Yecu otero kwede jo ma onongo gibino bote ma nongo gimito kony adada. (Luka 5:12, 13; 8:43-48) En onongo paro pi jo ma gitye ki peko. (Mar. 7:31-35) En onongo ngeyo kit ma jo mukene giwinyo kwede dok bene paro pigi. En onongo pe neno gik i kit ma dano moni nen kwede ki woko keken. (Luka 7:36-40) Adada, Yecu onyuto kica pa Lubangawa kikome.
3 ‘Kica Omake’: Yecu pe otimo ticce me pwony me cobo mere tic ma kimiye ci otum. ‘Kica omake’ i kom dano. (Mar. 6:34) I kare-ni bene, wan pe watito lok me kwena maber-ri keken ento watemme me laro kwo pa dano. Temme kong me niang pingo dano gigamo lok i yo moni-ni. Pingo tamgi nok nyo pe giketo cwinygi? Mono lukwat me dini goba owekogi woko liyak nyo obwologi? Ka wanyuto miti i kom dano ci romo weko giwinyo lok me kwena maber-ri.—2 Kor. 6:4, 6.
4 Nyuto kica gudo cwiny dano. Me lapore: Dako mo owinyo malit adada i kare ma orwenyo nyare ma onongo tye ki dwe adek keken. I kare ma Lucaden aryo ma mon gubino i doggolane, en oye ni gudony i ot ki tam ni omyero epyem i kom tyen lok ma gin bimiyone i kom gin ma omiyo Lubanga oye ni peko obed tye. Ento i yo ngeye, dako man owaco ni: “Gin guwinyo lokka ki twon kica madit, dok i kare ma gia, onongo awinyo maber adada ma omiyo aye ni dok gudwog cen ka limma.” In tika iyelle me nyuto cwiny me kica bot jo ducu ma irwatte kwedgi i tic me pwony?
5 Bedo ki kica bikonyowa me cuko cwiny dano. Timo meno weko waketo deyo i kom “Won ma lakica,” Jehovah.—2 Kor. 1:3.