Bed Ngat ma ‘Lakica’
1. Gin ango ma dano mito matek i kare-ni?
1 Pe tye kare mo i tekwaro ma dano mapol dong gitye ka yenyo cwiny me kica calo kare-ni. Jami maraco ma timme i lobo-ni kelo turcwiny, par, dok miyo dano moni tamo ni en dong konye peke. Dano milion mapol gimito kony, dok wan macalo Lukricitayo myero wanyut ni ada waparo pi jiraniwa. (Mat. 22:39; Gal. 6:10) Dong waromo nyutu parwa nining?
2. Yo maber loyo ango ma watwero nyutu kwede kica?
2 Tic me Kica: Kwe cwiny me ada a ki bot Lubanga, pe tye gin mo mapat ma kelo kwe cwiny marii. (2 Kor. 1:3, 4) Jehovah kwayowa me poro kit mere me “kica,” dok en omiyo botwa tic me tito kwena maber me Ker-ri bot jiraniwa. (1 Pet. 3:8) Timo tic man ki tekowa ducu aye yo maber loyo me kweyo cwiny jo ma ‘cwinygi otur’ pien Ker pa Lubanga keken aye obedo gen ma pe tur pi dano ducu ma gitye ki peko. (Ic. 61:1) Pi kica ma en tye kwede pi dano-ne, cokcok-ki Jehovah bijwero tim maraco woko ducu ci en bikelo lobo manyen me kit matir.—2 Pet. 3:13.
3. Waromo neno dano kit ma Yecu onenogi kwede nining?
3 Nen Dano Kit ma Yecu Onenogi: Kadi ka Yecu otito kwena bot jo ma gugure mapol, en onongo pe neno dano calo gurup. Ento en onongo tamo pi dano acel acel ma gitye ki peko i yo me cwiny. Dano magi onongo gitye calo romi ma lakwatgi pe. Gin ma Yecu oneno ogudo cwinye matek mumiyo en oketo cwinye ka pwonyogi. (Mar. 6:34) Ka waneno dano kit ma Yecu onenogi kwede bicuko cwinywa me nyuto ni wan ada waparo pi dano acel acel. Man bene romo nen i lokwa ki i wangwa. Tito lok me kwena maber-ri bibedo gin mukwongo i kwowa, dok wabitic ki lok ma rwatte maber me konyo cobo peko pa dano acel acel.—1 Kor. 9:19-23.
4. Pingo myero wanyut cwiny me kica bot dano?
4 Lwak dano mapol ata ma gua ki i rok ducu gitye ka winyo lok me kwena me Ker-ri pi miti ma dong kinyutu i komgi. Ka wamedde ki nyutu cwiny me kica bot dano, ci wabikelo deyo bot Jehovah dok wayomo cwiny Lubangawa ma lakica.—Kol. 3:12.