Dong Ngec ki Pwoc i Kom Kit pa Jehovah Mabeco ma Lapore Pe
1 I ticwa me pwony-nyi, wan pe wapwonyo dano ki lok ada me pwony mukwongo me Baibul keken. Ento wakonyogi wek gunge Jehovah maber ki dok me bedo ki pwoc pi kite mabeco ma lapore pe. Ka ce jo ma cwinygi tye atir gungeyo lok ada i kom Lubanga, ci kelo alokaloka madit i kwogi, ma weko gicako loko kwogi ‘wek obed ma myero bot Jehovah dok ma yomo cwinye.’—Kol. 1:9, 10; 3:9, 10.
2 Gin Kony Manyen me Kwan: Buk me Baibul Pwonyo nyuto kit pa Jehovah cakke ki i acakkine cut. Dul me acel gamo lapeny macalo: Lubanga tika ada tamo piri?, Lubanga mono tye nining?, Twere mono me nyikke cok ki Lubanga? Dul man bene tito pi lengo pa Jehovah (para. 10), paro pi dano ki ngolo kop atirre (para. 11), marre (para. 13), tekone (para. 16), ki dong kicane, berre, weko bal, diyo cwiny-nye, kacel ki genne (para. 19). Paragraf 20 dong tweyo tere ni: “Ka imedde ki keto cwinyi i pwonyo lok i kom Jehovah, ci ibinongo niango matut i kome, dok biweko iwinyo ni itye cok kwede dok mari i kome bimedde.”
3 Yo ango ma watwero tic kwede ki buk me Baibul Pwonyo me konyo lutino kwanwa me Baibul wek gunyikke cok ki Jehovah? I yo nge nyamo paragraf mo ma nongo loko i kom kit pa Lubanga acel moni, watwero penyo latin kwanwa ni, “Man miyo iniang gin ango i kom Jehovah?” nyo ni, “Man nyuto ni Lubanga tye ki miti i komi nining?” Ka wabedo ka tic ki lapeny macalo magi kicel kicel i kare me kwanwa, ci wabipwonyo lutino kwanwa me lwodo lok i kom gin ma gitye ka kwanone dok man bikonyogi me bedo ki pwoc pi kit pa Jehovah mabeco ma lapore pe.
4 Ti ki Bok me Nyamo Lok: Ka wuo i agikki me dul acel acel, peny latin kwan wek omi lagamme i kom lok acel acel ma tye i bok me “Gin ma Baibul Pwonyo” kun nongo en pe kwano akwana. Nyutte bene ginacoya mogo ma kicimo ento nongo pe kicoyo kenyo. Me golo tam ki i cwiny latin kwan, iromo penye ni, “In itamo ningo i gin ma Baibul pwonyo i kom lok man?” Ka itimo kumeno, ci nongo inyutte lok ma pigi tego i dul moni-ni ki dok bene bikonyi me niang maber ka ma niye pa latin kwanni ocung iye. Man bikonyo latin kwanni me cako dongo wat macok i kin en ki Jehovah.