Vidio ma Omyero Watam i Iye Matek
“Vidio man miyo itamo adada!”
“Odonyo i cwinya mada!”
“Abedo ki twon yomcwiny madit atika!”
1 In bene mono iwinyo kumeno i kare ma ineno vidio me Young People Ask—How Can I Make Real Friends tyen mukwongo? I mwaki mo mukato angec, omego mo ma onongo pud tidi obedo ka limo peko i kwone pi lurem ma en obedo kwede. Gin gumiyo mitine pi lok me ada okwe, ma omiyo en orwenyo watte ki Jehovah woko. Ci i yo ngeye vidio me Real Friends okatti. En ocoyo ni: “I kare ma abedo ka neno vidio man teretere, pig wanga obedo ka cwer adada. Apwoyo Jehovah pi kony ma en omiyo i karene kikome.” Vidio man otugo cwinye me loko kwone ki dok me nongo lurem matir. En omedo ni: “Man nyuto ka maleng ni wun kara wungeyo jami ma yelo jo matino.” Lunyodo ki bulu, pingo pe kong wunen vidio man dok odoco i kare me kwan macalo luot ma wubibedo kwede? Juku vidio man kong manok i nge neno dul acel acel, ci wunyam lapeny ma tye i paragraf magi labongo umo lok mo.
2 Acakkine: Larem me ada obedo kit larem ango?—Car. 18:24.
3 Jami ma Gengowa Nongo Lurem: I yo ango ma iromo jwayo kwede tam ni in gire kiweyi idong keni? (Pil. 2:4) Pingo mitte ni omyero iyub kiti, dok nga ma romo konyi me yubone? Gin ango ma romo yabbi yo me nongo lurem mapol, dok giromo nonge kwene?—2 Kor. 6:13.
4 Bedo Larem ki Lubanga: I yo ango ma iromo bedo kwede ki wat macok ki Jehovah, dok pingo timo meno pire tek? (Jab. 34:8) Angagi ma giromo konyi maber me jingo watti ki Lubanga?
5 Lurem Maraco: Lurem maraco gubedo lurem ango? (1 Kor. 15:33) Lurem maraco gitwero balo kwo me cwiny pa dano moni nining? Lok ma Baibul waco i kom Dina romo pwonyi ki gin ango?—Acak. 34:1, 2, 7, 19.
6 Gin ma Otimme i Kare-ni: Bedo ken ken otimo gin ango i kom Tara? En ocero ngeye pi mako lureme ki bulu me lobo nining? Gin marac ango ma gin guterre iye? Pingo lunyodone pe guniang jami maraco ma onongo tye ka timme i kwone, ento gubedo ki kit cwiny ango me konye wek ocang i yo me cwiny? Lamego mo ma obedo painia marii onyuto ni ebedo larem Tara maberre nining? Pingo Lukricitayo omyero gulub lok ma tye i Carolok 13:20 ki Jeremia 17:9? Pwony ango ma pire tek ma Tara onongo?
7 Agikkine: Pwony ango ma inongo ki i vidio man? In iromo tic ki pwony ma inongo-ni nining me konyo jo mukene?—Jab. 71:17.