Cwiny me Mine Ken Kelo Mot Mapol
1. I yo ango ma Daudi gin ki Nekemia gunyut kwede cwiny me mine ken?
1 I kare ma Goliac obedo ka yeto lulweny me Icrael, ngat mo acel ki i kingi-ni onongo romo lweny i kome. Ento latin awobi mo ma obedo lakwat, ma pe bene opwonnye i kit me lweny aye dok omine. (1 Cam. 17:32) I kare ma Lujudaya ma gubedo i opii gudok cen i Jerucalem ci pe gucobo tic me gero celle, lamak kikopo pa kabaka me Percia aye omine me weko dog ticce ma pire tek i gang kal pi cito i Jerucalem ka yubo yub pi tic meno. (Nek. 2:5) Jehovah omiyo mot i kom Daudi gin ki Nekemia, pi cwiny maber ma gunyuto.—1 Cam. 17:45, 50; Nek. 6:15, 16.
2. Pingo Lukricitayo omyero gunyut cwiny me mine ken?
2 I kare-ni cwiny me mine ken dong tye manok mada i lobo. I kare man me ‘agikki-ni,’ dano gitye ki tic mapol adada dok polgi gudoko “lumar komgi kengi.” (2 Tem. 3:1, 2) Twero bedo yot mada bot ngat moni me kulo wiye i timo gin ma konyo en kene ma weko en pe bedo ki kare me mine me konyo jo mukene ka ce mitte. Ento macalo Lukricitayo, wan wamito lubo lanen pa Yecu ma obedo kakwanyo karene me konyo jo mukene. (Jon 5:5-9; 13:12-15; 1 Pet. 2:21) Dong watwero nyuto cwiny man me mine ken-ni nining, dok mot ango ma wabinongo?
3. Cwiny me mine ken weko cokke woto maber nining?
3 Mine pi Utmegiwa: Watwero miyo “mot mogo me cwiny” bot jo mukene ki mine me miyo lagam ka ce mitte i kare me cokke. (Rom. 1:11) Miyo lagam kelo deyo i kom Jehovah, weko lok me ada moko i tamwa ki i cwinywa, dok wanongo mit pa cokke. (Jab. 26:12) Watwero bene dyere me miyo pwony i Cukul me Tiokraci ka ce ngat ma omyero omi-ni pe. Man bikonyowa i dongo dirowa me pwony.
4. Yo mukene ango ma watwero nyuto kwede cwiny me mine ken?
4 Utmego gitwero nyuto cwiny me mine ken ki tiyo tic ma miyo kitwero cimogi me timo tic mogo i kacokke. (Ic. 32:2; 1 Tem. 3:1) Wan ducu watwero miyo kony me weko gure matino wa ki madito woto mapwot ki dyere me tic i dipatmen mapat pat ma nongo tye. Ka wamine me tic kacel ki laneno me adwol i ticwa me pwony nyo miye cam, ci man kelo ‘cuko cwiny i kinwa kekenwa.’ (Rom. 1:12) Ka wakonyo lutino kic, mon to, jo ma two ki lugoro, mege ma gitye ki lutino matino ki jo mukene me kacokke, ci wanongo yomcwiny ki cwak pa Jehovah.—Car. 19:17; Tic 20:35.
5. Lok ango ma mako Ot me Ker ma mito jo ma gimine ki cwinygi kengi?
5 Yo mukene ma waromo nyuto kwede cwiny me mine ken aye obedo yubo ki gwoko Ot me Ker wek obed maleng. Medo i kom meno, kit macalo dano mapol gitye ka doko jo muye, Odi me Ker mitte mapol ki dok jo ma myero gumine me konyo tic me gedogi bene. Jo ot mo acel gujalo karegi me konyo jo me Regional Building Committee ma i kabedogi kadi bed ni gin onongo gipe ki diro me gedo. Mot mot kipwonyogi, dok kombeddi dong gimiyo kony i cweyo cwec ki matafali. Dakone owacci “Adwogi me tic kacel ki jo mukene okelo lurem macok i kinwa. I agikki me tic nongo waol ento i yo me cwiny nongo wanongo kero.”
6. Pingo ticwa me pwony-nyi aye obedo tic me mine ma pire tek ma watwero timone?
6 Ki Tito pi Kwena: Tic me mine ken ma pire tek ma watwero timone i kare-ni aye obedo tic me tito pi kwena me Ker-ri. Ka dano gunongo kony me niang ki dok lubo cik me Baibul, ci gicako nongo tyen lok me bedo kwo ki dok ginongo teko me juko kit me kwo maraco. Gingeyo pi gen ma mwonya ma Baibul miyo pi anyim. Ka wapwonyo dano ki Baibul, nongo watye ka timo tic me mine ken ma kelo botgi adwogi maber ma rii naka. (Jon 17:3; 1 Tem. 4:16) Cawa mukene nyo kit ma watye kwede miyo twere ki wan me nywako i tic man pi cawa malac ki tic calo painia pi tutuno nyo painia marii, cito ka ma lutit kwena mitte iye tutwal, nyo pwonyo leb mukene.
7. Pingo mine ken obedo gin ma pire tek i kare-ni?
7 Kabaka Daudi oloko macalo lanebi ni i kare ma nongo Meciya cako iye locce, jo pa Lubanga “gibimine kengi.” (Jab. 110:3, ftn.) Kit ma Jehovah aye tye ka cwako mac i te tic me kac-ci, omiyo tic ma mito mine ken tye mapol adada. (Ic. 60:22) In tika dong iwacci: “An ene; ora.”? (Ic. 6:8) Adada, ka wanyuto cwiny me mine ken, ci wayomo cwiny Jehovah dok wanongo mot mapol.