In Tika Itye Atera pi Peko ma Poto Atura?
1. Pingo bedo me ryeko me yubbe pi peko ma poto atura con?
1 Mwaka ki mwaka dano milion mapol i but lobo ducu, ma i kingi tye iye omego ki lumegiwa gideno can pi pekki ma poto atura calo oyengyeng, tuge pa pii i nam ma kilwongo ni tsunamis, kot ma cwer ki yamo magwar, yamo lapiru matego, ki pong pa pii ma mayo ngom. Kit macalo peko magi poto atura dok twero gudo ngat mo keken i kinwa-ni, bedo me ryeko me yubbe pire con.—Car. 21:5.
2. Pingo omyero luelda gunge ka ma wabedo iye kacel ki namba cimwa?
2 Yubbe Con: I kare mukene luloc gimiyo ngec con pi peko ma obipoto. Pire tek me lubo lok meno. (Car. 22:3) I kare ma kit meno luelda gitemme me niango jo ducu me kacokke wek okonyogi me yubbe con. I nge poto pa peko, luelda gitute me roto dano ducu me kacokke me neno ka ce gitye maber ki dok me niang kit kony ango ma nongo mitte. Cawa mapol twero balle ka ce luelda onongo pe gugwoko lok ma dok i kom kit me kubbe ki omegigi. Pi meno bedo ber ka lutit kwena gumiyo ngec i kom ka ma gibedo iye ki namba cimgi bot karan kacel ki lanen wi cokkegi me kwano buk.
3. Wan waromo lubo lok pa luelda nining ka ce wabedo i kabedo ma peko ma poto atura maro timme iye?
3 Ka kacokkewu tye i kabedo ma peko ma poto atura maro timme iye, ci luelda gitwero penyo lutit kwena me miyo nying kacel ki namba cim pa wadigi ma gibedo ka ma boco ma kiromo kubbe kwedgi ka ce peko mo otimme. Man bikonyo luelda me ngeyo angagi ma nongo dong gua woko con. Luelda bene giromo miyo yub mo bot jo me kacokke, ma man romo bedo iye jami ma gitwero gwokone i ot, yo me a woko oyotoyot, kacel ki kit me konyo lugoro. Lubo yub me mar ma kit man pire tek.—Ibru 13:17.
4. Ngo ma omyero watim ka peko mo opoto atura i kabedowa?
4 Inge Poto pa Peko: Gin ango ma omyero itim ka peko mo opoto atura ka ma ibedo iye? Omyero inen ni inongo yo me cobo peko ma mako jami me kom pa jo me paconi. Ka ce itwero, ci mi kony bot jo mukene ma nongo peko-ni ogudo komgi. Temme me kubbe ki ngat ma neno wi cokkewu me kwano buk nyo laelda mukene cut cut. Myero inen ni itimo man kadi bed pekone pe ogudi dok pe imito kony mo. Ka ce imito kony mo, ci bed ki gen ni utmego nongo gitye ka yelle ki tekgi ducu me konyi. (1 Kor. 13:4, 7) Wii pe owil ni Jehovah nongo ngeyo peko ma in itye iye; ket genni i kome ni en bigwoki. (Jab. 37:39; 62:8) Bed atera me miyo kony i yo me cwiny kacel ki kweyo cwiny jo mukene. (2 Kor. 1:3, 4) Ka twere omyero wucak ticwu me tiokraci i kit ma jwi i yo ngeye cut.—Mat. 6:33.
5. Peko ma poto atura gudo wan macalo Lukricitayo nining?
5 Kadi bed peko ma poto atura tye ka kelo par mapol, wan pud watwero neno anyim ki gen. Cok cok-ki pekki ma poto atura ducu dong bibedo peke. (Yabo. 21:4) Ento i kare man ma pud odong-ngi, watwero kwanyo yo ma mitte me bedo atera pi peko ki jami mogo maraco ma timme kun nongo wamedde anyim ki mit kom i tito lok me kwena maber-ri bot jo mukene.