Wii Pe Owil i Kom Jo ma Gugiko Tic me Pwony Woko
1. Pingo omyero wakwany kare me cuko cwiny jo ma gugiko tic me pwony?
1 In mono ingeyo dano mo ma dong otyeko giko tic me pwony woko? Kare mukene nongo en dong ojuko ribbe ki jo me kacokke woko dok otyeko nyiko mabor kwedgi. Oromo bedo ni irwatte ki dano ma kit man i kare ma nongo itye i tic me pwony i ot ki ot. Omyero wiwa opo ni dano man nongo pud obedo omegiwa me cwiny. Omyero wanyut marwa pire dok wakonnye me dwogo cen i kacokke ki dok me dok bot ‘lakwat ki lagwok kwowa.’—1 Pet. 2:25.
2. Waromo cuko cwiny dano ma ogiko tic me pwony woko nining?
2 Nyut ni Iparo Pigi: Goyo cim bot ngat ma dong ogiko tic me pwony woko nyo cito ka limme romo konnye me niang ni wan pud wiwa pe owil i kome. Ngo ma watwero lokone bote? Twero bedo me cuko cwiny bote ka waweko en ongeyo ni wan onongo watamo pire. Wek lokki obed mamit dok ma dongo en. (Pil. 4:8) Waromo tite pi gin mo ma oyomo cwinywa i cokke mo ma obedo macok cok-ki. Waromo bene lwonge me bino i cokke nyo i gure ma obibino kun wagwoko kabedo pire i mutokawa nyo wamine cente me wot.
3. Lamego mo ma ogiko tic me pwony woko odwogo cen nining?
3 Lamego mo ma onongo ogiko tic me pwony pi mwaki makato 20 kulu kinonge i wang tic mo acel. Kadi bed en onongo cwinye pe mito kwano Baibul, ento lamego ma ononge-ni odok cen ka limme, oweko bote magajin ma obino manyen. I nge gure madit me distrik, latit kwena-ni onywako lok mogo ma pigi tego ma kimiyo i gure ca gin ki lamego man, mot mot en odwogo cen.
4. Omyero water ngat ma ocako ribbe kwedwa odoco i cokke nining?
4 Ka Ngat Moni Odwogo Cen: Ka omego mo ma onongo ogiko tic me pwony woko ocako bino odoco i cokke, omyero watere nining? Yecu kono otero lupwonnyene nining i kare ma gin kong guweko lubo kore woko? En olwongogi ni “utmegina” dok onyuto gen i komgi. En bene omiyo botgi tic ma pire tek. (Mat. 28:10, 18, 19) I nge meno cut, gin gumako tito pi kwena maber-ri ‘ma pe gikeng.’—Tic 5:42.
5. Tit kong ngo ma ka warwatte kwede ci omyero walok pire bot luelda i lok ma mako ngat ma nongo ogiko ticce woko.
5 Ma nongo peya wacako kwano Baibul ki omego mo ma onongo kong ogiko tic me pwony woko nyo ma peya walwongo omego mo ma ogiko tic me pwony pi kare malac me wot kwedwa i tic me pwony, omyero kong wanong tira ki bot luelda. Ka warwatte ki ngat ma ogiko tic me pwony woko i wang ticwa, omyero waniang luelda wek gumi kony ma mitte.
6. Yomcwiny ango ma wan wabinongo ka wakonyo jo ma gugiko tic me pwony woko?
6 Baibul nyuto atir ni jo ma bikanyo nio i agikki aye gibinongo larre. (Mat. 24:13) Pi meno, tam pi jo ma dong cwinygi odok cen nyo ma dong gitye mabor kwedwa. Ka waporo kit mar pa Jehovah ki nyuto miti i kom jo ma kit magi, ci wan bene wabibedo ki yomcwiny me neno kit ma dok gidwogo kwede cen i tiyo tic maleng-ngi kacel kwedwa.—Luka 15:4-10.