Waromo Konyo Jo ma Gubino i Kwer me Nipo Nining?
1. Caden magwar ango ma kibimiyone i Marci 22, mwaka 2008?
1 I Marci 22, mwaka 2008, dano milion mapol i twok lobo ducu gibinongo caden magwar. Jo ma gubibedo tye i kwer me Nipo man gubiwinyo lok i kom mar madit pa Jehovah i miyo ginkok pi dano. (Jon 3:16) Gubingeyo lok kom Ker-ri ki dok kit ma Jehovah bitic kwede me cobo mitine pi lobo. (Mat. 6:9, 10) Gibineno ki wanggi mar kacel ki ribbe ma tye i kin jo pa Lubanga ki dok gibineno jol ma malo ma wabimiyogi.—Jab. 133:1.
2. Waromo konyo lutino kwanwa me Baibul ma gubino i Nipo nining?
2 Lutino Kwan me Baibul: I kin jo ma gubibedo tye obedo jo ma nongo pud wacako kwano Baibul kwedgi acaka. Nyutgi bot omego ki lumego. Tit botgi pi cokke ma bedo i cabit ki cabit. I cawa me pwony, lalok bicuko cwiny jo ma kit meno me medde ki dongogi i yo me cwiny. Iromo tic ki lokke-ni me cuko cwiny latin kwanni bene.
3. Waromo cuko cwiny lutit kwena ma ticgi okwe woko ma gubino i Nipo nining?
3 Jo ma Ticgi Okwe Woko: Jo mukene ma bibedo tye bene obedo lutit kwena ma ticgi okwe woko. Kwany kare me motogi ki yomcwiny. Gwokke ki i penyo peny ma mako kwogi nyo loko lok mogo ma romo keligi lewic. I nge kato pa Nipo nitap, luelda omyero gulim jo mogo ma ticgi okwe woko ma gubino i Nipo, pwogi pi tutegi me bedo tye dok lwongi me bino i cokke ma obibinone.
4. Wan ki acel acel waromo konyo wele nining?
4 Wele: Jo ma nongo gubino-ni mogo oromo bedo jo ma nongo wangeyogi nyo jo me odiwa ma walwongogi. Mukene nongo gubedo jo ma gunongo lwongo i kare me rwec ma kite dok pat-ti. Ka ineno ngat mo ma pe ingeyo, kwany kare me nyutte bote dok ijolle. Jo magi mogo nongo ma naka peya gubino i cokkewa mo. Ka wutye ka boko lok, iromo penyogi kit ma itwero nongogi kwede doki. I nge kwer me Nipo, itwero limogi nyo goyo cim botgi me dongo mitigi kun ipenyogi ka wutwero cako kwano Baibul kwedgi.
5. Ngo ma waromo lokone me cako kwano Baibul ki dano?
5 Ngec ma kimiyo i pwony me Nipo-ni aye waromo tic kwede calo te guti me cako kwano buk me Baibul Pwonyo ka wadok cen ka lim. Me labolle, lalok me Nipo bikwano buk pa Icaya 65:21-23. Ka idok cen ka lim, iromo lok i kom pwony me Nipo ka dong iwacci, “Wek kong anyutti mot mogo ma bibino pi ginkok man.” Ci wunyam jami ma tye i pot karatac 4-5 i buk me Baibul Pwonyo. Nyo iromo wacci, “Jo mapol gipenye kekengi pi awene ma lok ma tye i buk pa Icaya-ni bicobbe iye.” Ci wunyam paragraf 1-3 i dul me 9. Yo mukene me cako kwano Baibul ki dano aye me lok i kom gin ma lalok oloko iye, ci nyut buk me Baibul Pwonyo, ka dong nyut kit me kwanone.
6. Kare ango ma wan watye kwede i lubu cik pa Yecu me kwero tone?
6 Wan ducu omyero wati ki kare ma tye me konyo lutino kwan me Baibul, lutit kwena ma ticgi okwe woko, ki wele ma gubibino i kwer me Nipo. (Luka 22:19) Jehovah bigoyo laane i kom yellewa me medo ticwa pi Ker-ri.