Lapeny Pa Lukwan Bukkewa
Tika kit abongwen ma kiryeyogi i Jo Galatia 5:22, 23 gin keken aye gubedo “nyig ma nyak pi cwiny maleng”?
Tyeng magi oryeyo kit pa Lukricitayo abongwen: ‘Nyig ma nyak pi cwiny maleng gin aye mar, yomcwiny, kuc, diyo cwiny, kica, ber, gen, mwolo, jukke ken.’ Pe omyero watam ni magi keken aye gubedo kit ma cwiny maleng pa Lubanga twero konyowa me dongone.
Wangeyo meno nining? Ma peya lakwena Paulo oryeyo nyig ma nyak pi cwiny maleng, en ocoyo ni: ‘Tic me kit pa dano gin en: tim kwele, caro, tarwang, woro cal jogi, talo dano, mone, daa, nyeko, kiniga, laro dito, pyem, pokke, nek, mero ki kongo, cam me yomcwiny me mingo marac, ki mogo mukene macalo meno.’ (Gal. 5:19-21) Paulo ogiko lokke ki waco ni “ki mogo mukene macalo meno,” ma man nyuto ni en onongo twero ryeyo jami mukene, calo ma tye i Jo Kolocai 3:5 bene macalo “tic me kit pa dano.” I yo acel-lu, i nge ryeyo kit mabeco abongwen-ni, en otito ni: ‘Cik mo pe ma kwero gin macalo magi.’ Pi meno, Paulo onongo pe tye ka ryeyo kit ducu mabeco ma cwiny maleng twero konyowa me dongone.
Man nen ka maleng ka waporo lok pa Paulo man ki gin ma en ocoyo bot kacokke me Epeco, ni: “Nyig ma onyak pi ceng nen woko i gin ducu ma tye maber, dok atir, ki me ada.” (Ep. 5: 8, 9) Kit “maber,” kacel ki kit ma atir ki ada, gubedo but “nyig ma onyak pi ceng,” ento bene obedo but “nyig ma nyak pi cwiny maleng.”
I yo acel-lu, Paulo ocuko cwiny Temceo me ‘keto cwinye i kit ma atir, i lworo Lubanga, i niye, i mar, i diyo cwiny ki i mwolo’—kit abicel ma mwonya adada. (1 Tem. 6:11) Kit angwen i kin magi (niye, mar, mwolo ki diyo cwiny) kiryeyogi bene i kin “nyig ma nyak pi cwiny maleng.” Ento onongo mitte ni Temceo bene onong kony pa cwiny maleng me dongo kit mukene ma kiryeyogi kany calo: kit ma atir ki lworo Lubanga.—Por ki Jo Kolocai 3:12; 2 Petero 1:5-7.
Pi meno, Jo Galatia 5:22, 23 pe oryeyo kit ducu ma Lukricitayo omyero gudong. Cwiny maleng pa Lubanga twero konyowa me dongo kit abongwen mapatpat ma kiryeyogi macalo “nyig ma nyak pi cwiny maleng.” Ento tye bene kit mukene ma omyero wadong wek wadok Lukricitayo ma guteggi kun ‘waruko kit pa dano manyen ma giketo i cal pa Lubanga kikome i ada me kit ma atir ki maleng.’—Ep. 4:24.