‘Ngat ma Medde ki Cung Matek i Atematema Tye ki Yomcwiny’
1 Lukricitayo ducu girwatte ki atematema. (2 Tem. 3:12) Atematema twero bino i yo mapol calo two, can lim, abita, aunauna, nyo i yo mukene. Catan kelo atematema ki miti me jwiko ticwa me pwony macalo Lukricitayo, nyo bene me jukowa woko ki tic pi Lubanga. (Yubu 1:9-11) Cung matek i atematema kelo yomcwiny nining?—2 Pet. 2:9.
2 Yubbe pi Atematema: Jehovah otyeko miniwa Lokke me ada ma tye iye rekod me kwo kacel ki pwony pa Yecu. Wagedo guti matek me kanyo atematema ki winyo lok pa Yecu ki dok lubugi. (Luka 6:47-49) Wanongo bene kero ki kony mukene ki bot omegiwa ma gubedo Lukricitayo, i cokkewa, kacel ki bukke ma jenge i Baibul ma lagwok ot ma lagen dok maryek coyogi. Watiyo teretere ki mic me lega ma Lubanga ominiwa.—Mat. 6:13.
3 Jehovah bene ominiwa gen. Ka wadongo niye matek i cikke pa Jehovah, genwa doko calo ‘lajuk mel ci miyo cwinywa bedo tek kun pe wawire atata.’ (Ibru 6:19) I kare macon me Baibul, mel onongo pe a weko wang wat labongo lajuk mel, kadi bed ni nongo yamo opye mot. Ka yamo magwa ocako kodo atura, ci bolo lajuk mel i nam twero juko mel wek pe yamo oter ocibal woko i dog nam ma obedo gotgot. I yo acel-lu, dongo niyewa i cikke pa Lubanga i kare-ni miyo wacung matek ka peko obino. Peko romo ngolle atura. Kadi bed ni kijolo kwena maber ma Paulo gin ki Barnaba gutito i Licitra, ento pinye olokke woko cutcut i kare ma Lujudaya ma lujemo guo kunnu.—Tic 14:8-19.
4 Cung Matek Kelo Yomcwiny: Cung matek i ticwa me pwony kadi bed adegadega tye miyo wabedo ma nongo wiwa opye mot. Wabedo ki yomcwiny ka kikwanowa ni wan wamyero pi nongo lewic pi Kricito. (Tic 5:40, 41) Kanyo atematema konyowa me dongo kit me mwolo, winy, ki diyo cwiny. (Nwo. 8:16; Ibru 5:8; Yak. 1:2, 3) Pwonyowa bene me jenge i kom Jehovah, me geno cikkene, ki dok tero en macalo kakanewa.—Car. 18:10.
5 Wangeyo ni atematema-ni ducu tye pi kare manok. (2 Kor. 4:17, 18) Atematema miniwa kare me nyutu tut pa marwa pi Jehovah. Ka wacirogi ducu, ci nongo wamiyo lagam i kom adot pa Catan. Pi meno pe myero wail cingwa woko! ‘Ngat ma medde ki cung matek i atematema tye ki yomcwiny, pien en binongo mot me lalukana me kwo.’—Yak. 1:12.