Watero Worowa me Ada Calo Mot ma Pire Tek!
1 Ma naka yam dano cak ki kwo, Jehovah obedo ka miyo bot luticce mot mapat pat. En ominigi mot magi labongo poko kin co ki mon, mwaka, nyo rwom me kwogi. (Luka 1:41, 42; Tic 7:46; Pil. 1:29) Kit mot ango ma en omiyo botwa i kare-ni?
2 Mot Mogo ma Watye Kwede: Watye ki mot madit ni Jehovah aye pwonyowa. (Mat. 13:11, 15) Pako Jehovah i yo me miyo lagam i cawa me cokke obedo mot mukene ma watero calo gin ma pire tek. (Jab. 35:18) Ka kicimowa me miyo lagam, wamiyo ki yamo komwa. I yo acel-lu bene, ka waneno tic acel acel ma kiminiwa i kacokke macalo gin me deyo, ci wabitiyone ki kerowa ducu. Tika watiyo ki mot me nywako i tic me yubo ki gwoko Ot me Ker wek obed maleng, kare ki kare?
3 Kadi bed dano milion mapol pe gingeyo ka gwok nyo Lubanga winyo legagi, wan watye ki mot madit ni Ngat ma pire tek loyo ducu i polo ki lobo winyo legawa. (Car. 15:29) Jehovah winyo lega pa luticce en ki kome. (1 Pet. 3:12) En pe paro kadi waleg bote tyen adi. Pud dong watero mic me lega bote “kare ducu” calo gin ma pire tek ya!—Ep. 6:18.
4 “Lutic Kacel ki Lubanga”: Mot acel ma pud dong ber loyo ma watye kwede aye obedo tito pi kwena maber me Ker pa Lubanga macalo jo ma ‘tiyo kacel ki Lubanga.’ (1 Kor. 3:9) Man obedo tic ma kelo yengo dok gonyo kom. (Jon 4:34) Onongo bene pe tye ni Jehovah omyero oti ki dano me cobo tic man, ento en omiyowa tic man pien marowa. (Luka 19:39, 40) Pi meno, Jehovah pe omiyo mot man bot dano ducu. Jo ma ginywako i tic me pwony omyero kong gukwo i kit me kwo ma mitte i yo me cwiny. (Ic. 52:11) Tika wanyutu ni watero mot man calo gin ma pire tek ki tiyo tic me pwony-nyi i cabit ducu?
5 Mot ma a ki bot Jehovah weko wayeng ki kwo. (Car. 10:22) Omyero pe watergi calo gin ma konygi pe! Ka wanyutu ni ada watero mot me ticwa-ni calo gin ma pire tek, ci wayomo cwiny Wonwa me polo, ma en aye Lami ‘mot kacel ki gin mabeco ducu.’—Yak. 1:17.