Tito pi Ker-ri Obedo Tic Mo ma Pire Tek Atika
1 Nino ducu dano bilion mapol ata i lobo-ni ginongo kony ki i kom jami mapol ma Jehovah oketo me gwoko kwo. (Mat. 5:45) Ento jo manok keken aye ginyuto pwocgi bot Lacwecgi ki tito lok i kom kwena maber me Ker pa Lubanga. (Mat. 24:14) In itero tic man calo gin ma pire tek?
2 Tito lok i kom Ker-ri keto deyo i kom Lubanga dok bene kelo gen ki kuc bot jo ma cwinygi cwer pi jami maraco ma timme i kare-ni. (Ibru. 13:15) Jo ma gijolo kwena-ni, gibinongo kwo ma pe tum. (Jon 17:3) Kit tic ango ma kitiyo i lobo-ni ma twero kelo kodi adwogi maber kit man? Lakwena Paulo onyuto pwocce pi tic me pwony man ki tiyo tic matek. En otero ticce me pwony-nyi calo twon lonyo madit.—Tic. 20:20, 21, 24; 2 Kor. 4:1, 7.
3 Nyuto Pwoc pi Ticwa-ni: Yo acel ma wanyuto kwede pwocwa pi ticwa me pwonyo kwena maber-ri aye obedo keto cwinywa i kit ma wapwonyo kwede. Wan mono wakwanyo kare me yubo kit me cako lokwa i yo ma gudo cwiny jo ma giwinyowa? Tika watwero tic ki Ginacoya ki diro ka watye ka nyamo lok ki dano? Wan mono watiyo i wang tic ma kimiyo ni wati iye-ni watyeko woko ducu? Tika wangeyo kit me cako kwano Baibul ki dano? Kit macalo Lukricitayo ma lugen me kare ma okato ki me kare-ni gutimo kwede, omyero wabed ki cwiny matir i kom tic man, ci biweko wan bene wamaro tic-ci.—Mat. 25:14-23.
4 Ka watye ka yelle ki peko ma bino calo adwogi me tiyo, two, nyo kit peko mo keken, bedo me kwe cwiny ka wangeyo ni tuttewa me tiyo tic me pwony-nyi obedo gin ma pire tek atika. Lok pa Lubanga niangowa atir ni Jehovah pwoyo yelle ma kit meno, kadi bed ni jo mukene gineno yelle meno calo gin ma konnye pe.—Luka 21:1-4.
5 Pwonyo lok i kom Ker-ri kelo yomcwiny madit atika. Lamego mo ma tye ki mwaka 92 owaco ni: “Ka aneno ngeya, anongo ni mwaki ma romo 80 kulu ma amine iye me timo tic pi Lubanga-ni obedo mot madit ma pe akoko iye ange mo! Ka onongo ni pud abicako kwo acaka, onongo kono dok amine en i kit tic acel-li pien ‘Mar pa Lubanga ma pe lokke ber kato kwo.’” (Jab. 63:3) Pi meno, wan bene omyero wamaru tic man ma pire tek ma oa ki bot Lubanga-ni—tic me tito pi Ker-ri.