Woro Jehovah Macalo Jo me Ot
1 I kare me Baibul, jo me odi onongo gitimo jami mapol kacel. Onongo gitimo tic ma gang ento tutwalle woro Jehovah aye macalo jo me ot. (Levi. 10:12-14; Nwo. 31:12) I kare-ni, i kabedo mapol jo me odi gitimo jami manok mada kacel. Ento, Lukricitayo giniang ber pa tic kacel macalo jo me ot, tutwalle ka odwogo i lok me woro. Ngene kene ni man yomo cwiny Ngat ma Ocako te yub me ot matek ka en neno ni jo me odi giribbe kacel ka wore!
2 Wotu i Tic me Pwony Kacel: Tito lok me kwena maber-ri kacel jingo wat i kin jo me ot. Pi meno, medo i kom wot kacel ki jo mukene me kacokke i tic me pwony, laelda omyero bene oti kacel ki dakone ki lutinone kare ki kare. (1 Tem. 3:4, 5) Kadi wa luneno ma giwoto awota bene omyero guket yub me tic kacel ki mongi i tic me pwony.
3 Lunyodo ma giwoto ka tito kwena kacel ki lutinogi gikonyogi me dongo macalo lutit kwena. Lutino gibineno yomcwiny ma lunyodogi tye kwede i tic me pwony ki dok kit ma lunyodogi nyutu kwede margi pi Jehovah ki pi dano bene. (Nwo. 6:5-7) Gin meno pe rweny ki i tam pa lutino i dongo ki doko ditogi. Lunyodo mo ma gitye ki lutino adek me kine ka mwaki 15, 18, ki 21 pud gimedde ki wot kwedgi i tic me pwony kare ki kare. Wongi owacci: “Wapwonyogi ki gin mo olo kare ducu. Dok watute matek me neno ni ticce obedo me yomcwiny ki dok me cuko cwiny.”
4 Wuyubbe Kacel: Jo me odi gunongo ni yubbe kacel me cito i pwony obedo gin maber. Lutino pol kare gimaro temo pwonygi kong bot jo me ot kun nongo gilokke aloka i bedo macalo rwod ot nyo latit kwena. Jo me odi mukene gitiyo ki dakika manok i nge kwangi me timo man.
5 Yomcwinywa medde ka wanywako i tic ma pire tek-ki kacel ki jo ma wamarogi. Tic me pwony i ot ki ot kacel ki dok cen ka lim, kwano Baibul ki dano, macalo jo me ot pud dong kelo yomcwiny ya! Pi meno, ka iworo Jehovah kacel ki jo me oti, ci iromo wacone ni: “Ento an gira ki jo ma i oda ducu wabitiyo bot Rwot.”—Yoc. 24:15.