Tute Matek me Timo Tic Mapol i Ticwa me Pwony
1 Lakwena Paulo ociko Lukricitayo me wot i yo pa Lubanga kun ‘gimedde anyim ki timone matek.’ (1 Tec. 4:1) Man tere ni omyero watim ngo? Tere ni omyero wamedde ki yenyo yo me timo tic mapol i ticwa me pwony, kun watute me ‘cobo ticwa ducu kakare.’—2 Tem. 4:5.
2 Miti: Timo tic mapol i ticwa me pwony a ki i mitiwa me tic pi Lacwecwa ki tekowa ducu. Wamito ni wadong i yo me cwiny dok wayeny yo me medo ticwa me pwony. Loko ticci me doko yo me kwowa kacel ki bedo ki cwiny maber bikonyowa me cobo yubwa me tiokraci.—Jab. 1:1, 2; Pil. 4:6; Ibru 10:24, 25.
3 Yelle me medo ticwa me pwony mito bedo ki cwiny me miyo kacel ki me jalle ken. Watwero dongo cwiny ma kit meno ka ce walego kun walwodo lok i kom lanen maber pa Yecu. (Mat. 20:28) Yecu onongo yom cwiny madit i tic pi dano i kare me ticce me pwony. (Tic 20:35) Wan bene waromo lubu lanen pa Yecu ki nyutu miti i kom dano ki bedo ma wangwa twolo me tic ki kare mo keken ma onen me timo tic mapol i ticwa me pwony.—Ic. 6:8.
4 Tic pa Lunyodo: Kiromo pwonyo lutino con ma nongo pud gitino me bedo ki cwiny me tic pi jo mukene kacel ki medo ticgi me pwony. Jo matino giromo neno kit ma nongo jo mukene me pacogi gitiyo kwede matek i medo ticgi me pwony. Omego mo obedo ki miti me timo tic mapol ma onongo en pud tidi pi bedo ka tic kacel ki kwarone i tic ma dok i kom tiokraci. Neno tute kacel ki yom cwiny pa kwarone ocwale me tic ki kare mo keken ma onen me tic pi omegine. I kare-ni en dong tye lakony kor tic.
5 Omego Mapol Mitte: ‘Ka ce dano mo opore me bedo latela, mitte ni en myero oti tic mabeco.’ (1 Tem. 3:1) Lok magi cuko cwiny omege me bedo ma nongo gupore me nongo mot me tiyo tic mogo ma lubbe ki dul pa Jehovah. Man pe mito diro mo ma kite dok pat. Omego ma mito medo ticce, keto pi Ker-ri bedo mukwongo dok tiyo tic me pwony ki mit kom. (Mat. 6:33; 2 Tem. 4:5) En bitute me bedo lanen maber bot jo mukene.
6 Wi Lobo Ducu: Jehovah dong tye ka ruyo tic me coko dano-ni. (Ic. 60:22) Mitte tutwal ni jo ducu ma gilubu lanen pa Yecu gumedde anyim ki timo tic me pwony-nyi matek. Ripot ma kwako wi lobo ducu pi mwaka 2006 me ticwa nyutu ni dano 248,327 gunongo batija. Man nyutu ni nino ki nino dano manyen makato 680 ginongo batija! Pi meno, dong wamedde wunu ki neno yo mapat pat me medde ki tiyo ticwa me pwony matek.