Lub Lanen ma Yecu Oweko
1. Lanen ango ma Yecu oweko?
1 Ka wanywako i tic me loko dano wek gudok lupwonnye, omyero wange ni lanenwa romo gudo cwiny jo ma nenowa. Yecu opwonyo ki lokke kacel ki ticce. Jo ma gubedo ka nene guneno mit kome, marre pi dano, mitine me lonyo nying Wonne, ki dong keto cwinye me cobo miti pa Wonne.—1 Pet. 2:21.
2. I yo ango ma lanenwa twero gudo kwede cwiny jo ma gitiyo kwedwa i tic me pwony?
2 Ka Watye i Tic me Pwony i Ot ki Ot: Lanenwa gudo kwo pa jo ma nongo gitye ka tic kacel kwedwa kit ma otimme i kom Yecu. Lutit kwena manyen kacel ki ma peya gucwiny, ma gineno mit komwa i tic me pwony gibitamo pi medo dirogi i tic me pwony. Ka gineno yomcwinywa ki miti ma wanyutu i kom jo mukene, ci wigi bipo pi ber pa nyutu kodi kit magi i ticgi me pwony. Ka gineno kit ma watiyo kwede ki Ginacoya ki diro, i dok cen ka lim, ki kit ma wakwano kwede Baibul ki dano, ci bitugo cwinygi me timone kit meno bene.
3. Lanenwa romo pwonyo lutino kwan me Baibul nining, dok giromo pwonyo gin ango?
3 Ka Watye ka Kwano Baibul ki Dano: Lutino kwanwa me Baibul tutwalle gibineno kitwa. Me labolle, kadi bed watit botgi ni yubbe pi kwan, neno ginacoya, nyo ngolo te lagam pire tek, gin gibineno ka ce wan bene wayubbe. (Rom. 2:21) Ka walubu cawa ma nongo wacikke iye me kwan kwedgi, ci pe giweko tic mukene ngolle ma balo kwano Baibulgi. Gibineno bene cwiny me dyere ma watye kwede i tic me pwony kacel ki niyewa matek. Pe bedo me ur ni lutino kwan pa jo ma gilubu lanen pa Yecu pol kare gibedo lumit kom, lutit kwena ma ginyako nyig mapol.
4. Ka watye i cokke, lanenwa miyo pwony ango?
4 Ka Watye i Cokke: Jo ducu me kacokke pa Lukricitayo gitye ki tic me pwony i yo me nyutu lanen maber i kare me cokke. Jo ma gitye ki miti ma gicako bino i cokke ginongo kony ki i lanen maber ma gineno ki i kacokke. Gibineno mar kacel ki ribbe ma tye i kin utmego, ki dong rukgi nyo bedogi ma nongo ginen maber. (Jab. 133:1) Lanen me wirewa i cokke labongo keng ki dok tito niyewa i dye lwak i yo me nyamo lok ma nongo tye bene binen. Welo mo ma obino i cokkewa mo acel oneno kit ma latin anyaka mo oyabo oyotoyot tyeng ma onongo kimito kwanone ki i Baibulle ki kit ma oketo kwede cwinye ka lubu kwanne, ci otugi penyo pi cako kwano Baibul, pi neno lanen meno.
5. Pingo omyero pe waca ber pa lanen ma wanyuto?
5 Ginacoya cuko cwinywa me poro lanen maber pa luwotwa. (Pil. 3:17; Ibru 13:7) Pi meno, omyero wiwa opo ni ka ce walubu lanen ma Yecu oweko macok, ci jo mukene gibinenone dok man twero gudo kwogi i yo maber. Ngeyo lok man omyero dong omi waket cwinywa i lok ma nonge i 1 Temceo 4:16 ma tye ni: “Gwokke keni, dok igwok pwonnyi bene.”