Wulub Lanen pa Lunebi—Amoc
1. Pingo lanen pa Amoc twero cuko cwinywa?
1 In mono dong ibedo ki lworo ni pe ipore me tito kwena pien ipe ki ngec muromo nyo ia ki i gang me can? Ka kumeno, lanen pa Amoc romo cuko cwinyi. En onongo lakwa romi dok onongo tiyo tic lejaleja kicel kicel, ento Jehovah omiye tic ma rwomme lamal me tito kwena ma pire tek mada. (Amoc 1:1; 7:14, 15) I yo acel-lu, Jehovah bene i kareni tye ka tic ki dano ma gimwol dok ma rwomgi tye lapiny. (1 Kor. 1:27-29) Pwony ango ma wanongo ki bot lanebi Amoc ma lubbe ki ticwa me pwony-nyi?
2. Pingo myero wacung matek ka wakemme ki aunauna i ticwa me pwony?
2 Cung Matek i Kare me Aunauna: I kare ma Amajia, lalamdog ma a ki tung kumalo me Icrael, ma woro cal latin dyang me jabu owinyo ka Amoc tito lok, en odok iye ni: ‘Cit gang! A iwekwa! Wan watye ki diniwa!’ (Amoc 7:12, 13) Amajia oloko lok woko i kare me en tye ka tito lok bot Kabaka Jeroboam wek ogeng tic pa Amoc woko. (Amoc 7:7-11) Ento Amoc pe obedo ki lworo. I kareni, ludito kanica giyenyo cwak pa luwibye wek giket aunauna i kom jo pa Jehovah. Ento, Jehovah ocikke ni pe tye jami lweny mo keken ma bicobo ticce i komwa.—Ic. 54:17.
3. Kwena me cwercwiny ki yomcwiny ango ma watito bot dano ducu i kareni?
3 Tit pi Ngolo Kop pa Lubanga ki Mot ma Tye ka Bino Anyim: Kadi bed Amoc otito kwena me ngolo kop i kom kaka apar me Icrael, en ogiko cocce kun loko i kom cikke pa Jehovah me kelo kuc ki mot mapol. (Amoc 9:13-15) Kadi bed wan bene watito pi “nino me ngolo kop” pa Lubanga, ento meno obedo but “kwena maber me ker” ma omyero watit pire. (2 Pet. 3:7; Mat. 24:14) Ka dong Jehovah otyeko jo maraco i Armagedon, meno biyabo yo pi lobo me doko paradic.—Jab. 37:34.
4. Gen ango ma tye ma bikonyowa me cobo miti pa Jehovah?
4 Tito kwena i lobo ma jo mapol gidagwa iye temo tutewa me gwoko dyerewa ki me timo miti pa Jehovah. (Jon 15:19) Kadi bed kumeno, pud watye ki gen ni Jehovah bimedde ki miyowa jami ma mitte me cobo mitine, kit ma en okonyo kwede Amoc.—2 Kor. 3:5.