Ket Obed i Yubbi me Kwano Baibul ki Dano
1 “Wuting wangwu malo, wunen kit ma dong poto ocek kwede me akaya.” (Jon 4:35) Lok man ma Yecu Kricito oloko-ni rwatte ki kwo ma Lukricitayo tye iye i kare-ni.
2 Jo ma cwinygi tye atir ma gimito ni kipwonygi ki yo pa Jehovah pud gitye ka nonge. Man tye ka nen i wel jo manyen ma gitye ka nongo batija mwaka ki mwaka. Dong ka itye ki miti me kwano Baibul ki dano, ci omyero itim gin ango?
3 Ket Obed Yubbi: Mukwongo, ket obed yubbi me cako ki dok kwano Baibul ki dano kare ki kare. Wek yub man obed i wi ka itye i tic me pwony. Kit ma ticwa macalo Lukricitayo kwako pwonyo kacel ki tito kwena-ni, omyero wan ducu wayeny yo me medo ticwa me kwano Baibul ki dano.—Mat. 24:14; 28:19, 20.
4 Gin Mukene ma Myero Watam Pigi: Gin ma pire tek ma lutit kwena me Ker omyero gutim obedo lega ma a ki i cwinywa. I cawa mukene wanongo dano ma nongo gulego Lubanga pi nongo kony me cwiny. Nongo ki dok pwonyo jo ma kit meno nongo obedo twon mot madit mada ma a ki bot Jehovah!—Ag. 2:7; Tic 10:1, 2.
5 Lamego mo olego pi nongo dano mo wek ekwan kwede Baibul ci oryeyo trak me In Mono Imito Ngeyo Lok Mapol Ikom Baibul? i gang ticce. I kare ma mego mo okwanyo trak acel okwano, ci ocako pongo kabedo ma tye i pot karatac 6, lamego-ni oloko kwede ci gucako kwano Baibul cut.
6 Lutit kwena ma gucwiny i lok me cako kwano Baibul ki dano giromo konyi me cobo yubbi me cako kwano Baibul ki dano. Ket obed i lega kun iwoto ki yenyogi. Ti ki kony ducu ma tye pi cobo yub man. Romo bedo ni cok cok-ki, ibikwano Baibul ki dano mo.