Kwe Cwiny Jo ma Cwercwiny Onurogi
1 Pe tye kare mo i tekwaro pa dano ma kwe cwiny pud dong mitte iye ma loyo i kare-ni. Pi lubu tela pa Kabakawa Kricito Yecu, wan bene watiyo matek me kweyo cwiny “jo ma cwercwiny onurogi.”—Ic. 61:1.
2 Kit me Kweyo Cwiny: Wek wakwe cwiny dano, kit ma waloko kwede i ticwa me pwony omyero obed ma rwatte dok ma cuko cwiny. Ka ce waweko lokwa i kom jami maraco ma tye ka timme i lobo-ni kacel ki pwony me goba bedo macek cek, ci lok me ada ma i Ginacoya kacel ki gen me kwe cwiny ma Lubanga ociko pire aye bedo cwiny lokwa. Man pe te lokke ni omyero pe dong walok i kom Armagedon. Ticwa obedo me tito pi “mwaka ma [Jehovah] bitimo iye ber bot dano, ki kare me culo kwor pa Lubangawa,” kacel ki ‘juko lutim maraco wek guwek timo gin maraco.’ Kadi bed kit meno, ciko dano pi Armagedon kacel ki tito pi rac ma bino ki i lweny meno pe omyero oum wi lokwa madit me tito pi kwena maber me Ker pa Lubanga.—Ic. 61:2; Ejek. 3:18; Mat. 24:14.
3 I Doggola ki Doggola: Pe obedo gin me aura me nongo jo ma nongo cwinygi otur pi peko me two, to pa danogi me amara, turo cik, nyo can lim. Macalo lulub kor Kricito, “kica” makowa ci miyo wanyutu parwa pi jo ma wanongogi i tic me pwony. (Luka 7:13; Rom. 12:15) Kadi bed ni nongo wanywako ginacoya acel nyo aryo mo ma rwatte ki peko pa ngati moni, ento omyero ‘wawiny lok oyotoyot,’ wek omi kare ki dano moni me tito lok ma tye i cwinye. (Yak. 1:19) I nge winyo tamme, wabedo ki ngec muromo me miyo lok me kweyo cwinye mupore.
4 I cawa ma nongo rwatte i kare me lokwa, waromo wacci, “Amito ni anywak kwedi lok mogo me cuko cwiny ma a ki i Baibul.” Omyero wabed ki wic ma kwiri pe me pyem i komgi tam ducu pa ngat moni kadi bed pe gitye atir. Me kaka meno, tamwa omyero obed me kweyo ki cuko cwiny kun nongo watiyo ki Ginacoya me jingo cwinye. Pi meno, itwero neno buk me Reasoning From the Scriptures pot karatac 117-121 i te wi lok ni, “Encouragement.” Nyo iromo miyo trak me Comfort for the Depressed ci wunyamo jami ma tye iye.
5 Yeny Yo me Kweyo Cwiny Jo Mukene: Gwok nyo ingeyo jiranini mo, latic lawoti, latin kwan lawoti, nyo rwod ot mo ma mito ni kikwe cwinye? Pingo pe ikwany kare me limo jo magi ki i gangigi ki yub me nywako kwedgi tam ma kweyo cwiny ma a ki i Ginacoya? Ngeyo pingo gimito kwe cwiny, miyo itwero yubbe me minigi kwe cwiny ma mitte. Pi meno jo mukene gucoyo waraga nyo gutiyo bene ki cim. Mar me ada pi luwotwa miyo wanyutu cwiny me kica kun wamiyo kwe cwiny ma a ki i Ginacoya.—Luka 10:25-37.
6 Adada, kiminiwa tic me kweyo cwiny jo ma kumu, me jingo cwiny jo ma cwinygi otur ki dok me miyo gen ma mwonya pi anyim. Man aye kwe cwiny ma dano ma i twok lobo ducu gimito i kare-ni. Bedo ka lok ki yomcwiny pi jami mabeco mapol ma Lubanga ocikke pire kelo kwe cwiny kacel ki gen bot jo ma cwinygi tye atir. Pi meno dong wiwa omyero opo ni mitte me kweyo cwiny jo ma cwercwiny onurogi.