Wacuko Cwiny Luwotwa ka Watye i Tic me Pwony
1 Wan ducu wanongo cuko cwiny ki i “lok ma giloko [i karene kikome].” (Car. 25:11) Ka ce watye ka tic ki jo mogo i ticwa me pwony, waromo timo ngo wek lokwa obed me cuko cwiny botgi?
2 Boko Lok ma Cuko Cwiny: Bedo ber tutwal ka ce lok ma waboko ki omegiwa ki lumegiwa jingo watwa ki Lubanga ka watye i tic me tito kwena! (Jab. 37:30) Waromo lok i kom kit ma pwonywa myero obed kwede nyo tito gin mo ma cuko cwiny, mutimme i tic me pwonywa cokcok-ki. (Tic 15:3) Nyo gwok wanongo gin mo manyen ki i kwano Baibul piwa kenwa, i magajin mukatti cokcok-ki, nyo ki i cokke? Waromo bene lok i kom jami mogo ma wawinyo ki i pwony ma kiyubo pi lwak ma kimiyo i Ot me Ker cokcok-ki.
3 Cwinywa romo tur ka inen rwod ot ongolo lokwa dok kit me tero wiye oloyowa woko. I nge kato woko, ber tutwal ka kong watero dakika mo manok wan ki ngat ma watye ka tic kwede-ni me neno kit ma myero kiter kwede wi ngat ma kit meno i kare me anyim kun waneno yo me cobone ki i buk me Reasoning. Dok ka ce yo me pwony pa ngat ma watye ka tic kwede-ni ber, ci waromo cuko cwinye ki miye pwoc.
4 In Aye Icaki: Mono tye jo mogo i gurupwa me cokke me kwano buk ma pe watiyo kwedgi cokcok-ki? Lwongo jo ma kit meno me tic kwedwa i tic me pwony romo ‘cuko cwinywa kekenwa.’ (Rom. 1:12) Painia marii kacel ki painia pi tutunu gimito jo ma myero giti kwedgi, tutwalle i odiko nyo otyeno, ma nongo lutit kwena nok i tic me pwony. Waromo konyo kor painia ki wot kwedgi i tic me pwony. Gwok nyo tye latit kwena mo ma tye ki goro ma genge cito i tic me pwony? Yubo yub me tic ki ngat ma kit meno, nyo calo i kwan ki lutino kwanwa me Baibul romo bedo me kony bot wan ducu.—Car. 27:17.
5 Pwoyo tic pa luwotwa kadi i gin matidi mo pol kare cuko cwiny tutwal. Ket meno obed i wi ka itye ka tic ki jo mukene i tic me pwony, kit macalo wamito ni ‘wamedde ki cuko cwiny ngat acel acel-li.’—1 Tec. 5:11.