Bed Lakony Maber i Tito Kwena i Doggola
1. Adwogi maber ango ma bino ka watiyo i ticwa me pwony ki ngat mukene?
1 I nino mo acel, Yecu ocwalo lupwonnyene 70 i tic me tito kwena kun “oorogi ki aryo aryo.” (Luka 10:1) Labongo akalakala mo, yub man omiyo kare bot lupwonnyene me konyo ki dok cuko cwiny luwotgi ka giwoto ki tic me tito kwena. Dong wan waromo miyo kony nining ka ce watye i ticwa me pwony ki latit kwena mukene?
2. Ka ngat ma watye ka tic kwede-ni tye ka miyo pwonye, pingo omyero wabed ka winyo lokke dok man watimo i yo ango?
2 Ki Winyo Lok: Ket cwinyi i winyo lok ka ngat ma wutye ka tic kwede-ni tye ka miyo pwonye. (Yak. 1:19) Ka kitye ka kwano ginacoya, lub ki i Baibulli. Bed ka neno wang ngat ma tye ka lok-ki, kadi bed lawoti ma itye ka tic kwede-ni nyo rwod ot. Ka iketo cwinyi me winyo lokgi, man twero cuko cwiny rwod ot me timo kit meno bene.
3. Awene ma ngat ma watye ka tic kwede-ni twero jolo lokwa?
3 Ki Pimo Cawa me Gamo Lok: Ka ngat ma watye ka tic kwede-ni tye ka miyo pwonye, wamiyo bote deyo ka wamine kare me lok. (Rom. 12:10) Omyero wagwokke pe me ngolo lokke. Ka wiye owil ki gin mo ma mito wacone nyo rwod ot ocako pyem nyo okelo lapeny ci ngat ma watye ka tic kwede-ni okwayowa pi kony, omyero watute me medo lokke-ni ma ka cako lok mukene. (Car. 16:23; Latit. 3:1, 7) Ka watye ka lok, lokwa myero okony kor caden ma kitye ka miyone-ni.—1 Kor. 14:8.
4. Gin ango ma kelo botwa yomcwiny ki adwogi maber i ticwa me pwony?
4 I kare ma lupwonnye 70 ma gubedo ka tic ki aryo aryo-ni gutyeko tito kwena, “gudwogo cen ki yomcwiny.” (Luka 10:17) Wan bene wabinongo yomcwiny ki adwogi maber i ticwa me pwony ka wawinyo dok wapimo cawa me gamo lok ka wakonyo ngat mukene me tito kwena i doggola.