Kibimiyo Caden Magwar Bot Jo ma Gibibedo Tye i Nipo
1. Medo i kom pwony, ngo mukene ma twero yomo cwiny wele ma gubino i Nipo? Tit kong.
1 Wabitute matek me lwongo dano wek gubin wanywak kwedgi kacel i yub man. Gin ma welle gibiwinyo pe bibedo mere gin ma yomo cwinygi keken. I nge tyeko yub me Nipo dako mo acel oloko i kom gin me en oneno—kit me lirem ma dano gunyutu, ki gedo ma mwonya dok maleng ma jo ma gujalo cawagi aye gugedo. Dong wan ducu, pe lalok keken, wabiribbe kacel i miyo caden i kom kwer man ma pire pud dong tek loyo i mwaka—Ep. 4:16.
2. Wan ducu ki acel acel waromo miyo caden bot welle nining?
2 Mot Wele ki Yomcwiny: Bwunyo me lirem kacel ki cwiny me mar ma wanyutu bot welle miyo caden botgi. (Jon 13:35) Kadi bed ni pe iromo lok ki dano ducu, olo iromo nyutu mar ka imoto dok ititte bot jo ma gubedo kangeti. (Ibru 13:1, 2) Bed ka ngiyo ka tye welle mogo ma nongo pe gingeyo dano mo i kinwa. Mogo nongo gunongo karatac me lwongo i kare me rwec. Iromo penye ni, “Man mono tyen mukwongo boti me o kany?” Kwagi wek ibed kacel kwedgi dok imi lagam i lapeny mogo ma gitye kwede. Ka kacokkewu bia woko oyot pi weko kabedo pi kacokke mukene, iromo wacci: “Amito winyo tammi i kom pwony ma wawinyo kombeddi-ni. Tika tye yo mo ma aromo rwatte kwedi doki?”
3. I yo ma nining ma waromo jolo kwede jo ma ticgi okwe woko?
3 Wujol Jo ma Ticgi me Pwony Okwe Woko: Wangeyo ni lutit kwena ma ticgi okwe woko, ki jo ma gimaro nywako kwedwa i kwer me Nipo keken gibibedo tye. Wujolgi dok wumi gunge ni, cwinywu yom me nenogi. (Rom. 15:7) Luelda giromo limo paci pa jo magi i nge Nipo cut cut wek gicuk cwinygi me medde ki ribbe ki kacokke. Walego ni dano mapol i kin jo ma bibedo tye-ni gudong miti me pako Lubanga, pe pi gin ma giwinyo keken ento bene pien ‘guneno tic maber ma watiyo wek obed botgi macalo caden.’—1 Pet. 2:12; NW.