Kwano Baibul Piri Keni ki dok Calo Jo me Ot Pire Tek!

1. Par ango ma Lukiko Madit tye kwede piwa i kareni, dok pingo?

¹ Kit ma obedo kwede i cencwari me acel, Lukiko Madit giparo mada pi gwoko ber bedo pa jo pa Jehovah. (Tic 15:6, 28) Kit macalo twon can madit atika-ni dong tye ka nyiko cok, mitte tutwal ni lutit kwena ducu me Ker-ri gubed ki wat macok ki Jehovah. Dong ibitiyo ki cawa ma yam bedo pi cokke me kwano buk-ki nining? Kicuko cwiny dano ducu me tic ki cawa man pi worogi macalo jo me ot. Tic ki cawa man ki ryeko biweko wakwano Lok pa Lubanga matut pi nongo adwogi maber.—Jab. 1:1-3; Rom. 11:33, 34.

2. Waromo yubo otyeno me worowa macalo jo me ot nining?

² Otyeno Me Woro pi Jo me Ot: Kicuko cwiny luwi odi ducu me cobo tic ma Jehovah ominigi me neno ni yub me kwan macalo jo me ot kilubo. (Nwo. 6:6, 7) Omego ki lumego ma peya gunyomme ma gipe ki tic mapol gibibedo ki kare muromo me kwano Baibul pigi kengi kacel ki kwan me kwedo lok. Pire tek ki wan ducu me tic ki ‘kare ma tye i yo maber’ pi kwan ki lwodo jami ma wakwanogi wek wabed ki wat matek i yo me cwiny i ‘kare man marac-ci.’—Ep. 5:15, 16.

3, 4. Tam ango ma kimiyo pi jami me akwana ma waromo tic kwedgi, kun nongo waketo tamwa i kom gin ango?

³ Jami me Akwana: Wek yub me kwanwu macalo jo me ot obed me yomcwiny, ngec mabeco romo nonge i Watch Tower Publications Index nyo Watchtower Library i CD-ROM. Jo me ot bene giromo kwano pwony ma bino kare ki kare i Watchtower ma wiye tye ni, “Lagony me Kwo me Ot me Yomcwiny,” “Pwony Lutinoni,” ki “Pi Jowa Matino.” Awake! bene tye ki pwony ma wi lokke tye ni “Lapeny pa Jo Matino” ma bino kare ducu ki pwony mapat pat ma loko i kom cwec me aura.

⁴ Kwano Baibul mot twero weko cik ma iye lac pa Lubanga kacel ki pwonye moko i wi jo me ot dok gudu cwinygi. (Ibru 4:12) I kare mukene wutwero neno vidio ma dul pa Jehovah oyubo ka ingeye wunyamo lok i komgi. Kare tye muromo me yero jami me akwana ki diro ki dok kit me kwanogi. Pingo pe ipeny gin ma jo me ot-ti gimito ni kikwan ki kit ma myero gikwan kwede?

5. Pingo kwano Baibul kenken ki dok kwanone calo jo me ot pire tek i kwowa i kare-ni?

⁵ Gin Mumiyo Pire Tek i Kare-ni: Jingo watwa ki Jehovah konyowa me yubbe me ‘cung matek me neno kit ma Jehovah bilarowa kwede.’ (Nia 14:13) Lunyodo gimito ryeko ma a ki bot Lubanga me pito lutinogi i “kin lwak jo me kare-ni ma guballe woko-ni.” (Pil. 2:15) Lutino gimito kony me lweny ki i tim maraco ma tye i cukul i kare-ni. (Car. 22:3, 6) Jo munyomme omyero gujing ‘tol-gi adek ma kiwiyo kacel’ ki Jehovah. (Latit. 4:12) Pi man, wan ducu myero watiyu ki kare mudong-ngi kiryeko wek wabed i ‘niyewa maleng tutwal-li’!—Juda 20.