Awene ma Ker pa Lubanga Biloyo Lobo?

JAMI MENE MA YECU OWACO NI OBITIMME?

Yecu owaco ni: “Rok bilweny ki rok wadi, ker bilweny ki ker wadi. Ki oyengyeng madongo biyengo lobo, kec laparanat ki two gemo mapatpat bipoto.” (Luka 21:10, 11) Kit macalo lain ma tye i nyig cing dano pat pi ngat acel acel, jami magi ducu ka gutimme lawang acel binyuto ni “ker pa Lubanga dong onyiko cok.” Tika jami magi dong gutimme i kare marom? Tika gitye ka timme i wi lobo ducu? Nen kong jami ma moko.

1. LWENY

I mwaka 1914, lweny ocakke i rwom ma onongo peya otimme con i tekwaro pa dano! Lukwan lok me tekwaro pol kare giwaco ni mwaka 1914 obedo mwaka ma tekwaro pa dano olokke iye pien man aye bene mwaka ma lweny me acel me wi lobo ocakke iye. Lweny meno obedo acakki me tic ki jami lweny calo bom ma kibolo ki i dege, muduku ma neko dano lumuku kacel ki yamo poijon me neko dano mapol i kabedo mapol. Man otugo lweny me wi lobo me aryo, dok i lweny man kicako tic ki bom ma neko dano lumuku. Cakke i mwaka 1914, dano gubedo ka lweny i kabedo mapatpat, dok lweny magi oneko dano milion mapol.

2. OYENGYENG

Buk me Britannica Academic otito ni mwaka ki mwaka oyengyeng ma romo 100 ma tekogi twero “balo jami” timme. Dok ripot mo pa dul ma kilwongo ni United States Geological Survey otito ni “ma lubbe ki rekod mo (ma kigwoko nicakke i kine ka mwaka 1900), mwaka ki mwaka wageno ni oyengyeng matego ma romo 16 wang ma otimme.” Kadi bed jo mogo giwaco ni medde pa wel oyengyeng magi tye macalo adwogi pa macin mabeco me pimo oyengyeng, lok ada tye ni oyengyeng matego ma timme i but lobo tye ka kelo pekki dok neko dano mapol adada.

3. KEC

Kec pol kare bino macalo adwogi me lweny, camucana, can lim, tic ki jami pur i yo marac, ki bene bedo ma pe kiyubbe pi ceng ma ryeny matek nyo cwer pa kot madwong. Ripot pa World Food Programme me mwaka 2018 tito ni: “I but lobo ducu, dano milion 821 gipe ki cam muromo​—dok dano milion 124 gitye ka kanyo kec.” Two neto neko lutino milion 3.1 mwaka ki mwaka. I mwaka 2011, pacen 45 pa lutino ducu ma guto i wi lobo-ni guto ki two neto.

4. TWO KACEL KI TWO GEMO

Buk mo pa World Health Organization otito ni: “Two gemo madongo adada omako dano i cencwari me 21. Two macon calo​—kolera, plague ki yellow fever​—gudwogo cen woko, dok manyenne bene calo—​SARS (Severe acute respiratory syndrome), aburo ma mako dano lumuku, MERS (Middle East respiratory syndrome), Ebola kacel ki Zika gubino.” Ma dong nyen loyo aye two Korona. Kadi bed ni lucayan kacel ki ludaktari dong gupwonyo jami mapol adada madok i kom two, pe gumedo ki nongo yadi ma twero jwayo two woko ducu.

5. TIC ME TITO KWENA I WI LOBO DUCU

Yecu otito pi but lanyut mukene i kare ma owaco ni: “Lok man me kwena maber me ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.” (Matayo 24:14) Kadi bed ni dano gitye ka kato ki i pekki madongo i kare-ni, dano ma welgi kato milion aboro kulu ma gia ki i rok ducu gitye ka tito kwena maber me Ker pa Lubanga bot dano i lobe 240 dok i leb makato 1,000. Man obedo gin ma pud pe otimme i tekwaro pa dano.

LANYUT MAN TYEN LOKKE NGO BOTWA?

Lanyut ma Yecu oloko iye-ni tye ka timme i kare-ni. Pingo omyero wabed ki miti i kom lanyut man? Pien Yecu owaco ni: “Ka wuneno gin magi otimme, myero wunge ni ker pa Lubanga dong onyiko cok.”​—Luka 21:31.

Lanyut me jami ma Yecu oloko iye, kacel ki kwano mwaka ma lubbe ki Baibul konyowa me niang ni Lubanga oketo Kerre i polo i mwaka 1914.a I kare meno, en oketo Wode, Yecu Kricito macalo Kabaka. (Jabuli 2:2, 4, 6-9) Cokcok-ki, Ker pa Lubanga biloyo lobo, dok bijwayo gamente ducu ci weko lobo doko paradic wek dano okwo iye pi naka.

Macok cok-ki, lok ma tye i lega ma Yecu opwonyo ni: “Ker meri obin; giti gin ma imito i lobo kit ma gitiyo i polo” bicobbe. (Matayo 6:10) Ento, gin ango ma Ker man obedo ka timone nicakke i kare ma ocako loc i mwaka 1914? Dok gin ango ma watwero kurone ka Ker man ocako loyo dano?