Pwony me 6

Paradic Dong Cok!

Jami maraco ma tye katime i lobo i kareni nyuto ni Paradic dong cok. Baibul owacci wabineno kare marac ma nongo Paradic dong cok bino. Dong watye ka kwo i kit kare meno kombedi! Man aye jami mogo ma Baibul owaco ni bitimme:

Mony madito. “Rok bilweny ki rok wadi, ki ker bene bilweny ki ker wadi.” (Matayo 24:7) Lok pa lanebi man dong otyeko cobe kakare. Cake i mwaka 1914, mony me wilobo otime tyen aryo ki mony matitino mapol. Dano million mapol guto i iye.

Nya pa two. “Two gemo mapatpat bipoto i kabedo mapol.” (Luka 21:11) Man dong ocobe kakare? Eyo. Two kanca, two adunu, aona apio, malaria, two jonyo ki two mukene oneko dano million ki million.

Can cam. Jo ma pe tye ki cam muromo tye i kabedo ducu i lobo. Dano million mapol to ki kec mwaka ki mwaka. Man bene lanyut mukene ni Paradic dong cok ki oo. Baibul wacci: “Kec bene bipoto.”​—Marako 13:8.

Oyengyeng. “Oyengoyeng biyengo lobo i kabedo mapol.” (Matayo 24:7) Man bene dong ocobe kakare i kare wa-ni. Dano makato million acel dong guto ki oyengyeng nicake imwaka 1914.

Lutim maraco. Dano bibedo jo ma “lumar lim” ki jo ma “maro komgi kengi.” Gibibedo jo ma “maro yomcwiny ma ka maro Lubanga.” Litino bibedo ma “pe gibiwinyo lunyodogi.” (2 Temceo 3:1-5) In pe iyee ni dano mapol gitye kit man i kare ni? Pe gimiyo woro i kom Lubanga, ki gikelo ayela i kom jo ma giteme me pwonyo lok i kom Lubanga.

Turo cik. Dok bene “tim maraco bibedo ka medde.” (Matayo 24:12) Ageno ni in iyee ni turo cik tye marac kato i mwaki mukato angec. Dano kabedo ducu tye ki lworo ni gibiyakogi, kibicamogi aram nyo kibiwanogi.

Jami magi ducu nyuto ni Ker pa Lubanga dong cok. Baibul wacci: “Ka wuneno gin magi otimme, myero wunge ni ker pa Lubanga dong onyiko cok.” (Luka 21:31) Ker pa Lubanga obedo gin ango? Obedo gamente me polo pa Lubanga ma bikelo Paradic i wi lobo man. Ker pa Lubanga bileyo ka ka gamente pa dano.​—Daniel 2:44.