Mok Tammi me Cwako Ker pa Lubanga Kombeddi!
Go kong ni yamo lapiro magwar tye ka bino ka ma ibedo iye. Lutic pa gamente gitye ka miyo lok angeya man ni: “WUA WOKO! WUYENY KAGWOKKE KOMBEDDI!” Gin me ryeko ango ma onongo ibitimo? Labongo akalakala mo ibiyenyo kabedo ma itwero gwokke iye.
Ki lok ada, wan ducu watye ka kwo i yo ma “yamo lapiro” ma Yecu olwongo ni “twon can madit atika” bikato ki iye. (Matayo 24:21) Pe watwero wene ki i yo pa can madit atika man. Ento watwero timo gin mo me gwoko kwowa. Man gin ango?
I Pwonnye me Wi Got, Yecu Kricito omiyo tira man: “Wukwong keto cwinywu i kom kerre [pa Lubanga], ki nongo kit ma atir ma en tye kwede.” (Matayo 6:33) Watwero timo man nining?
Wukwong keto cwinywu i kom Ker pa Lubanga. Man tyen lokke ni omyero wanen Ker pa Lubanga calo gin ma pire tek loyo ducu i kwowa. (Matayo 6:25, 32, 33) Pingo omyero wabed ki neno ma kit man? Pien dano adana pe gitwero cobo pekkigi. Ker pa Lubanga keken aye ma twero cobo tic man ma oloyo dano woko-ni.
Yeny kit mere ma atir. Omyero watute matek me kwo ma lubbe ki cik pa Lubanga kacel ki pwony me Baibul. Pingo? Pien ka wamoko tam piwa kenwa i kom gin maber ki marac, ci adwogine bibedo marac adada. (Carolok 16:25) Ki tungcel, ka wakwo ma rwatte ki cik pa Lubanga, pe wayomo cwiny Lubanga keken ento bene wanongo adwogi maber i kwowa.—Icaya 48:17, 18.
Wumedde ki keto cwinywu i kom Kerre, kacel ki kit mere ma atir. Yecu ociko ni jo mogo kibiwiro tamgi woko ci gicako tam ni ka gitiyo cente madwong ci kwogi bibedo yot. Jo mukene gibiweko paro pi jami me kom bwoyogi woko ma weko pe gibedo ki kare me keto cwinygi i kom Ker pa Lubanga.—Matayo 6:19-21, 25-32.
Ento Yecu ocikke ni jo ma gimiyo cwak ki Ker pa Lubanga gibibedo ki jami ma mitte me kwo i kare-ni kacel ki mot mapol i anyim.—Matayo 6:33.
Kadi bed lupwonnye pa Yecu i cencwari me acel onongo gitye ka keto pi Ker pa Lubanga kacel ki kit mere ma atir bedo mukwongo, pe guneno agikki me arem ki deno can i kare me kwogi. Ento kigwokogi. Man otimme nining?
Gin gukwo kwo ma rwatte ki rwom me kit ma atir pa Lubanga, dok man ogwokogi ki i deno can ma jo ma gikwero lubo cik pa Lubanga gikato ki iye. Gen matek ma gubedo kwede i kom Ker-ri okonyogi me kato ki i pekki madongo adada. Dok Lubanga ominigi “tek madwong me twero” wek gukany pekki magi.—2 Jo Korint 4:7-9.
TIKA IBIKETO PI KER-RI BEDO MUKWONGO?
Lukricitayo me cencwari me acel gulubo tira ma Yecu omiyo ni omyero guket pi Ker-ri obed mukwongo. Gutito kwena maber me Ker-ri i kabedo ducu i but lobo ma gibedo iye. (Jo Kolocai 1:23) Tika tye jo mo ma gitye ka timo meno i kare-ni?
Ada, tye! Lucaden pa Jehovah gingeyo ni kare odong manok adada wek Lubanga okel agikki me kare man. Pi meno, gitye ka timo jami ducu ma gitwero me cobo lok pa Yecu man ni: “Lok man me kwena maber me Ker pa Lubanga gibitito i wi lobo ducu, me bedo caden bot rok ducu; ka dong lacen agikki piny bibino.”—Matayo 24:14.
Ibidok nining i kom kwena maber man? Walegi ni ilub lanen pa jo ma onongo gibedo i boma me Berea i lobo Makedonia. I kare ma guwinyo kwena maber me Ker-ri ki bot lakwena Paulo, gujolo lok man “ki cinggi aryo.” Dok ‘gungiyo Ginacoya ma yam gicoyo’ me moko ka rwatte ki lok ma kitito botgi-ni ci guketo i tic jami ma gupwonyo.—Tic pa Lukwena 17:11, 12.
In bene itwero timo meno. Ka iketo pi Ker pa Lubanga obedo mukwongo i kwoni dok iketo cwinyi me lubo kit mere ma atir, ci ibinongo ka gwokke kombeddi kun ibedo ki kuc kacel ki kwo maber i anyim.