Kit me Tic ki Buk me ‘Mar pa Lubanga’ i Kwano Baibul ki Dano
1. Pingo kiyubo buk me ‘Mar pa Lubanga’?
1 Cwinywa pud dong obedo yom me nongo buk manyen ma wi lokke tye ni ‘Wubed i Mar pa Lubanga’ i Gure Madit me Distrik me “Cwiny pa Lubanga aye Telowa!” Kit ma kitito kwede, buk man kiyubo me konyowa me ngeyo ki maro rwom me kwo matir ma Jehovah oketo, ento pe me pwonyo ngec ma pigi tego ma tye i Baibul. Pe wabitero buk man i ticwa me pwony i doggola ki doggola.
2. Buk man kibitic kwede nining, dok ki angagi?
2 Buk man bibedo buk me aryone ma myero kikwan ki latin kwan me Baibul i nge tyeko buk me Baibul Pwonyo. Wi myero opo ni dano dongo mapat pat i yo me cwiny. Kwan acel acel myero owot ma lubbe ki teko me niang pa latin kwan. Nen-ni jami ma wupwonyo ducu oniange maber. Pole tye ni, buk man pe myero kiti kwede me kwano Baibul ki jo mogo ma dong gukwano bukke mapol i kare mukato angec ento pe gibino i cokke dok pe gitye ki miti me loko kwogi ma lubbe ki ada ma gupwonyo ki i Baibul.
3. Ngo ma myero watim ka ce watye ka kwano buk me Wor Lubanga i kareni?
3 Ka wutye ka kwano buk me Wor Lubanga i kareni ki latin kwan mo dok wudong ki dul mogo manok keken me tyekone, wuromo tyeko buk man kun icuko cwiny latin kwan me kwano buk me ‘Mar pa Lubanga’ pire kene. Ka pe, ci romo bedo ber me lokke i buk man manyen-ni kun wucako ki i acakkine. Nyamo ngec ma tye i lamed ngec cung i miti pa ngat moni calo i kit me buk me Baibul Pwonyo.
4. Ngo ma myero watim ka latin kwanwa onongo batija ma peya otyeko buk me Baibul Pwonyo ki ‘Mar pa Lubanga’?
4 Ka latin kwan onongo batija ma peya otyeko bukke aryo magi ducu, ci wuromo medde ki kwan nio ka wutyeko buk me ‘Mar pa Lubanga.’ Kadi bed latin kwan dong onongo batija woko, pud iromo medde ki kwano cawa, dok cen ka lim, ki dok kwane calo latin kwanni me Baibul. Latit kwena ma owoto kwedi dok onywako i kwan meno bene romo kwano cawane.[6]
5. Waromo tic ki buk man me ‘Mar pa Lubanga’ me konyo lutit kwena ma dong gurii ma pe ginywako i tic me pwony nining?
5 Ka Komitti ma Neno wi Tic i Kacokke gucimi me kwano Baibul ki ngat mo ma ticce me pwony okwe woko, gin gibinyutti dul mogo ki i buk me ‘Mar pa Lubanga’ ma myero ikwan ki ngat meno. Kwan ma kit meno pe myero kiwek oter kare malac. Buk man manyen-ni pud dong opong ki jami mabeco adada, ma kiyubo me konywa wek wabed ‘i Mar pa Lubanga.’!—Juda 21.